O‘zbekiston ShHTga raisligi davrida amalga oshiriladigan vazifalar taqdimoti o‘tkazildi

Tashqi ishlar vaziri o‘rinbosari G‘ayrat Fozilov prezident tomonidan tasdiqlangan reja asosida O‘zbekiston tomoni 80 dan ortiq tadbirlar o‘tkazishi rejalashtirilganini ma'lum qildi. Bular qatoriga ShHTga a'zo davlat rahbarlari kengashi majlisi, tashqi ishlar vazirlari kengashi, xavfsizlik kengashi kotiblari uchrashuvi, tegishli soha doirasida vazirlik va idora rahbarlari uchrashuvlari, iqtisodiy forum, hududlar rahbarlari forumlari va boshqalar sanab o‘tildi.

Shuningdek, G‘ayrat Fozilov prezident Shavkat Mirziyoyev tomonidan O‘zbekistonning ShHTga raisligida amalga oshiriladigan ustuvor vazifalarni sanab o‘tdi.

• ShHTning nufuzi va salohiyatini yanada oshirish;
• ichki mintaqaviy savdoni rivojlantirish dasturini ishlab chiqish;
• sanoat kooperatsiyasi dasturini qabul qilish va bu borada hamkorlikni nazarda tutuvchi markazlarni tuzish;
• ShHTning Transport bog‘liqligi strategiyasini qabul qilish;
• ShHT makonida infratuzilmani rivojlantirish dasturini ishlab chiqish;
• kambag‘allikni kamaytirish va oziq-ovqat xavfsizligi sohalaridagi hamkorlikni kuchaytirish;
• ShHTning xalqaro axborot xavfsizligi bo‘yicha ekspertlar forumini ta'sis qilish;
• ShHTning Ezgu niyat elchisini institutini joriy qilish;
• turizm sohasida hukumatlararo bitimni ishlab chiqish;
• yuqumli kasalliklarga qarshi kurashishni nazarda tutuvchi «Yo‘l xaritasi»ni qabul qilish.

Tadbirda ishtirok etgan Qozog‘iston, Rossiya, Xitoy, Qirg‘iziston, Hindiston va Eron vakillari ham O‘zbekiston ilgari surayotgan vazifalarni birgalikda amalga oshirishga tayyorligini bildirdi.

Eslatib o‘tamiz, joriy yilning sentabr oyida Dushanbeda bo‘lib o‘tgan sammitda Shanhay hamkorlik tashkilotiga 2021–2022 yillarda raislik qilish O‘zbekistonga o‘tishi to‘g‘risida qaror qabul qilingan edi.