Bishkekda oʻtgan «SHHT+» sammiti maydonida aʼzo davlat liderlari oʻzaro uchrashuvlar ham oʻtkazdi. Rossiya prezidenti Putin va Armaniston bosh vaziri Pashinyan OAV uchun ochiq uchrashuv davomida tortishib qoldi. Albatta, tortishuv madaniyat chegarasidan chiqmadi, lekin bayonotlar bir-birini keskin rad etardi...
Referendum masalasi
Pashinyan va Putin kameralar qarshisida 15 daqiqa ochiq uchrashuv oʻtkazdi. Birinchi boʻlib Rossiya prezidenti soʻz oldi va Armaniston iqtisodiyoti Moskvaga qanchalik bogʻliq ekani haqida faktlar keltirdi. Xususan, Rossiyaning Armaniston iqtisodidagi hissasi 30 foizni tashkil etishi, bu borada eng asosiy hamkor ekani, oʻzaro tovar aylanmasi yil boshidan buyon 2,5 milliard dollarni tashkil etgani haqida gapirdi.
Shuningdek, Putin «Armanistondagi eng yirik soliq toʻlovchi korxonalar Rossiya kompaniyalari ekanini» eslatdi. Rossiya prezidenti Armaniston Yevroosiyo iqtisodiy ittifoqiga qoʻshilganidan keyin mamlakat yalpi ichki mahsuloti uch baravarga koʻpayib, 29 milliard dollardan oshganiga ham eʼtibor qaratdi.
Putinning nutqidagi asosiy mavzu esa tabiiyki Armanistonning Yevropa Ittifoqiga intilishi boʻldi. Putin oldinroq Yevropaga yuz tutgan Armanistonga Ukrainaning taqdirini eslatgandi. Oʻzaro uchrashuvda Putin Armaniston Yevropa Ittifoqiga qoʻshilishiga qarshi emasligi, lekin armanlarning Rossiya boshchiligidagi Yevroosiyo iqtisodiy ittifoqidagi taqdiri mujmal boʻlib qolishini aytdi. Yaʼni, Putin Pashinyanga navbatdagi marta aniq qilib aytdi: tanlang, yo biz yoki Yevropa!
Rossiya prezidenti bu masalani referendum bilan hal qilish toʻgʻriligi, Pashinyan oʻzaro suhbat vaqtida bunga qarshi emasligi haqida gapirganini eslatdi. Pashinyan esa Armaniston Yevropa Ittifoqiga qoʻshilish jarayonini boshlash toʻgʻrisida qonun qabul qilish orqali referendumga ehtiyoj qoldirmaganini aytdi: «Biz bu qonunni jamoatchilik tashabbusi bilan qabul qildik. Oʻsha paytdayoq qonunni qabul qilish orqali amalda referendum gʻoyasidan voz kechib boʻlgandik».
«Bu Rossiyaga qarshi ish emas»
Pashinyan Armanistonning YeIga intilishi mamlakat YEOII tarkibida boʻlishiga xalaqit beradigan hech qanday omil koʻrmayotganini aytdi: «Biz Armanistonning Rossiya va YeOIIdagi sheriklari bilan kelishuvlar bazasini oʻrganib chiqib, YeIga intilishimiz bu kelishuvlarga hech qanday dahl qilmasligini tahlil qildik. YEOII tashkil etilishi toʻgʻrisida kelishuvda ham aʼzo davlat uni tark etmoqchi boʻlsa, nima qilishi kerakligi aniq keltirilgan. Bu kelishuvda aʼzo davlatni chetlatish haqida gap yoʻq. Ittifoqni tark etmoqchi boʻlgan davlat olti oy avval hamkorlarni bu haqda ogohlantirishi aytilgan xolos».
