Qashqadaryoda aka o‘z ukasining oyoq-qo‘llarini sim bilan bog‘lab, tiriklayin yoqib yubordi

G‘uzor tumani IIB navbatchilik qismining 2021 yil 1 noyabr kuni soat 19:20 lardagi xabariga ko‘ra, G‘uzor tumani, Pachkamar qishlog‘idagi Eski gips tosh konidan yoshi 30-35 larda bo‘lgan erkak jasadi topilgan. Murda oyoqlari juft qilingan, ikkala qo‘llari orqaga qayrilib sim bilan bog‘langan, kuyish jarohatidan vafot etgan holda bo‘lgan.

Mazkur holat yuzasidan 2021 yil 2 noyabr kuni G‘uzor tumani prokuraturasi tomonidan Jinoyat kodeksining 97-moddasi 1-qismi bilan jinoyat ishi qo‘zg‘atilgan.

Tezkor surishtiruv davomida murda G‘uzor tumani, Sovlig‘or mahallasida yashovchi A.E. ekani, ushbu jinoyatni uning akasi K.E. sodir etgani aniqlangan.

Qayd etilishicha, marhum A.E. mast holatda doimiy ravishda onasi S.D.ni uyatli so‘zlar bilan haqoratlab, janjal qilib kelgan. 2021 yil 31 oktabr kuni soat 14:00 larda A.E. mast holatda onasi bilan yana janjallashib, uni haqorat qilib uydan chiqib ketgan. Buni eshitgan K.E. ukasini choyxonada sinfdoshlari bilan spirtli ichimlik ichib o‘tirgan joyidan topib, A.K.ga tegishli Lacetti mashinasida uyga olib kelgan.

So‘ng uni urib, qo‘l va oyoqlarini sim bilan bog‘lab, shu kuni soat 22:00 larda qasddan o‘ldirish maqsadida qo‘l va oyoqlarini bog‘lab o‘zining mashinasi yukxonasiga joylab, Pachkamar qishlog‘idagi adirlikka olib borib, ustiga benzin sepib yoqib yuborgan va qasddan o‘ldirgan.

2021 yil 2 noyabr kuni K.E. Jinoyat kodeksining 97-moddasi 1-qismi bilan gumon qilinuvchi tariqasida ishtirok etishga jalb qilingan hamda himoyachi bilan ta'minlanib, Jinoyat protsessual kodeksining 221-moddasi tartibida ushlangan.