Vazirlar Mahkamasining “Davlat bojxona qo‘mitasi to‘g‘risidagi nizomni tasdiqlash haqida”gi qarori loyihasi e'lon qilindi.
Nizomga ko‘ra, Davlat bojxona qo‘mitasi davlat bojxona xizmati organlari tizimining samarali faoliyat ko‘rsatishini ta'minlovchi, bojxona to‘g‘risidagi qonun hujjatlariga rioya etilishini, davlatning iqtisodiy manfaatlari va xavfsizligi himoya qilinishini ta'minlash sohasidagi nazorat bo‘yicha davlat boshqaruvi organi hisoblanadi.
Davlat bojxona qo‘mitasi Vazirlar Mahkamasiga bo‘ysunadi. Davlat bojxona qo‘mitasi, Davlat bojxona qo‘mitasining Qoraqalpog‘iston Respublikasi, viloyatlar, Toshkent shahar bo‘yicha boshqarmalari, «Toshkent-AERO» ixtisoslashtirilgan bojxona kompleksi, bojxona postlari, Bojxona instituti, Markaziy bojxona laboratoriyasi, shuningdek Milliy kinologiya markazi huquqni muhofaza qiluvchi organlardir.
Davlat bojxona qo‘mitasi tizimiga quyidagilar kiradi:
- Davlat bojxona qo‘mitasi markaziy apparati;
- Davlat bojxona qo‘mitasining Qoraqalpog‘iston Respublikasi, viloyatlar, Toshkent shahar bo‘yicha boshqarmalari;
- «Toshkent-AERO» ixtisoslashtirilgan bojxona kompleksi;
- bojxona postlari;
- Bojxona instituti;
- Markaziy bojxona laboratoriyasi;
- Milliy kinologiya markazi.
Davlat bojxona qo‘mitasining asosiy vazifalari quyidagilardan iborat:
- jismoniy va yuridik shaxslarning huquqlari, erkinliklari va qonun bilan muhofaza etiladigan manfaatlarini himoya qilish;
- o‘z vakolati doirasida O‘zbekiston iqtisodiy manfaatlarini himoya qilish va uning iqtisodiy xavfsizligini ta'minlash;
- bojxona nazorati va rasmiylashtiruvini amalga oshirish;
- bojxona to‘lovlarini undirish;
- bojxona to‘g‘risidagi qonun hujjatlariga rioya etilishi ustidan nazoratni amalga oshirish, qonun hujjatlari buzilishlarining, shu jumladan kontrabandaning oldini olish, ularni aniqlash va ularga chek qo‘yish;
- o‘z vakolatlari doirasida jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirg‘in qurolini tarqatishni moliyalashtirishga qarshi kurashish bo‘yicha chora-tadbirlarni ishlab chiqish va amalga oshirishda ishtirok etish;
