Samarqand Jahon turizm tashkiloti bosh assambleyasi sessiyasiga mezbonlik qiladi

Birlashgan Millatlar Tashkilotining Butunjahon turizm tashkiloti (UNWTO) 2023 yilda Samarqand shahrida o‘tkaziladigan bo‘ldi. O‘zbekiston Respublikasi bosh vazir o‘rinbosari, Turizm va sport vaziri Aziz Abduhakimov ayni damda Ispaniyaning Madrid shahrida o‘tayotgan UNWTO’ning 24-sessiyasi doirasidagi ovoz berish jarayoni natijalariga ko‘ra shu haqda ma'lum qildi.

“Shunisi diqqatga sazovorki, tarixda birinchi marta BMT oilasi tarkibiga kiruvchi tashkilotlarning Bosh assambleyasi O‘zbekistonda bo‘lib o‘tadi. Bularning bari prezidentimiz olib borayotgan siyosat, turizm sohasini rivojlantirish hamda bu orqali mamlakatimizning jahon sahnidagi nufuzini oshirish yo‘lidagi sa'y-harakatlar natijasidir.

Ta'kidlash lozimki, UNWTO 25-Bosh assambleyasining qadimiy Samarqandda o‘tkazilishi bu yerga mingdan ortiq xorijlik mehmonlarning tashrif buyurishi hamda bu orqali mahalliy aholi va hunarmandlarning daromad ko‘rishiga olib keladi.

Bundan tashqari, yuqori darajadagi tadbirning O‘zbekistonda o‘tkazilishi jahon ommaviy axborot vositalarining ham e'tiborini tortishi shubhasiz, bu esa oxir-oqibat mamlakatimizning turistik salohiyatini keng targ‘ib etish hamda yurtimizga yanada ko‘proq sayyohlarni jalb etish yo‘lida xizmat qiladi”, dedi Aziz Abduhakimov.

Shu o‘rinda qayd etish joizki, Butunjahon turizm tashkiloti va unga a'zo davlatlar bilan hamkorlik munosabatlarini rivojlantirish, shuningdek, mamlakatimizning xalqaro maydondagi nufuzini oshirish, xalqaro tashkilotlar bilan munosabatlarini yanada kengaytirish, madaniy va turizm salohiyatini targ‘ib qilish maqsadida 30 noyabr-2 dekabr kunlari O‘zbekiston delegatsiyasining Ispaniya qirolligiga tashrifi tashkil etildi. 24 sessiyada ishtirok etgan O‘zbekiston delegatsiyasi tarkibidan Turizm va sport vazirligi, Madaniyat vazirligi, Samarqand viloyati hokimligi hamda O‘zbekistonning Ispaniya qirolligidagi elchixonasi vakillari o‘rin oldi.

Madrid shahrida o‘tgan tadbir doirasida 2023 yilda UNWTO Bosh assambleyasini o‘tkazish uchun O‘zbekiston va Portugaliya da'vogarlik qildi. Tadbir yakuniga ko‘ra, O‘zbekiston yaqqol ustunlik bilan aksariyat ovoz to‘plab, 2023 yilgi Bosh assambleyani qadimiy Samarqand shahrida o‘tkazishga kelishildi.

Ta'kidlash joizki, bugungi kunda Samarqandning turistik salohiyatini yanada yuksaltirish hamda uni dunyo sayyohlik markazlaridan biriga aylantirish borasida ko‘plab ishlar olib borilmoqda, bu yerda obodonlashtirish ishlari bilan bir qatorda yangi zamonaviy aeroport hamda turizm obektlari bunyod etilmoqda. 

Shulardan biri “Samarkand Touristic Centre” bo‘lib, u eshkak eshish kanali qirg‘og‘ida 212 gektar maydonda qad ko‘tarmoqda. Bu yerda qurilayotgan “New Renaissance” kongress-holli, mehmonxonalar, restoranlar, dam olish maskanlari, savdo markazlari, amfiteatr, “Mangu shahar” kabi inshootlari hududning sayyohlik infratuzilmasini rivojlantirish yo‘lida xizmat qilishi shubhasiz. Yangi obektni 2022 yilning birinchi choragida ishga tushirish rejalashtirilgan.

Shuni alohida ta'kidlash joizki, UNWTO Bosh assambleyasi ikki yilda bir marta o‘tkaziluvchi eng muhim turistik forum bo‘lib, bunday yuqori darajadagi tadbir, ya'ni BMT oilasiga kiruvchi tashkilotlar Bosh assambleyasining O‘zbekistonda o‘tkazilishi birinchi tarixiy hodisadir.