O‘zbekistonda antiradarlar aniqlay olmaydigan «aqlli» qurilmalarni o‘rnatish boshlanadi

Namanganda antiradar uskunalar ish bermaydigan «aqlli» lazer qurilmalar namoyish etildi. Bu haqda viloyat hokimligi xabar bermoqda.

Foto: Namangan viloyati hokimligi

Namangan viloyati hokimi Shavkat Abdurazzoqov Turkiyaning "ÜÇ NOKTA" mas’uliyati cheklangan jamiyati xorijiy korxonasi investorlarini qabul qildi.

Dunyoning ko‘plab mamlakatlarida o‘zining ko‘p tarmoqli faoliyatini amalga oshirib kelayotgan “ÜÇ NOKTA” kompaniyasi viloyat markazida 10 million dollarlik investitsion loyihasini amalga oshirmoqda.

Unga ko‘ra, viloyatda yo‘l harakati qoidalarini buzganlikni foto va video qayd etish avtomatlashtirilgan tizimini amalga oshirish uchun amaliy qadamlar tashlandi. Bu yo‘l-transport hodisalari oldini olish, qonuniy talablar bajarilishi va inson omilini cheklash, korrupsiyaning oldini olishga xizmat qiladi.

Yo‘l harakati xavfsizligi tizimida o‘rnatish va foydalanish uchun ishlab chiqarilgan “aqlli radar sistemalari”ning yangi avlodi namoyish qilindi. Lazer tizimi bilan ishlovchi ushbu sistemaga qarshi har xil antiradar uskunalari ish bermasligi, tizim yo‘llar va chorrahalardagi harakatni tartibga solishi ta’kidlandi.

Avvalroq, Toshkentdagi barcha chorrahalarga kamera va fotoradarlar o‘rnatilishi xabar berilgandi.