Davlat xavfsizlik xizmati xabariga koʻra, tezkor tadbir DXXning Jizzax va Namangan viloyatlari boʻyicha boshqarmalari hamda bojxona organlari hamkorligida oʻtkazilgan.
Unda 20 ming, 50 ming, 100 ming va 200 ming soʻm nominaldagi qalbaki banknotlarni tayyorlash va sotish holati fosh etilgan.
Pop tumanida yashovchi, 1989-yilda tugʻilgan hamda Izboskan tumanida istiqomat qiluvchi, 1999-yilda tugʻilgan ikki shaxs 37,4 mln soʻmlik qalbaki pulni shartli xaridorga sotayotgan vaqtida ashyoviy dalillar bilan ushlangan.
Ularni shaxsiy tintuv qilish va boshqaruvidagi «Lasetti» avtomobili salonini tekshirish jarayonida jami yana 6,4 mln soʻmlik qalbaki pul borligi aniqlangan.
Tezkor tadbir davomida izboskanlik fuqaroning yashash xonadoni ham koʻzdan kechirilgan. U yerdan qoʻshimcha 7,7 mln soʻmlik qalbaki pul topilgan.
Shuningdek, xonadondan turli kupyuralar tasviri chop etilgan 145 dona oq qogʻoz, kompyuter, rangli printer va boshqa ashyolar protsessual tartibda rasmiylashtirib olingan.
Holat yuzasidan mazkur shaxslarga nisbatan jinoyat ishi qoʻzgʻatilgan. Tergov doirasida ularning ehtimoliy jinoiy aloqalarini aniqlash choralari koʻrilmoqda.
