Ukrainadagi 600 dan ziyod O‘zbekiston fuqarosi Polsha chegarasiga yetkazildi

Ukrainadagi O‘zbekiston fuqarolarining qanchasi Polsha chegarasiga yetkazilgani ma’lum qilindi. O‘zbekiston tashqi ishlar vazirligi rasmiy vakili axborot bilan chiqdi.

Videodan kadr

Qayd etilishicha, kecha, 27 fevral kuni Ukrainaning Lvov shahridan O‘zbekiston fuqarolaridan iborat navbatdagi guruh Ukraina-Polsha chegarasidagi «Krakovets-Karchova» nazorat-o‘tkazish punkti sari yo‘lga chiqqan.

Bundan tashqari, O‘zbekistonning Ukrainadagi elchixonasi taqdim etgan ma’lumotga ko‘ra, shu vaqtgacha 600 dan ziyod O‘zbekiston fuqarosi Polsha chegarasiga yetkazilgan.

Elchixona vakillarining ma’lum qilishicha, O‘zbekiston fuqarolarini evakuatsiya qilish ishlari izchil davom etmoqda.

Avvalroq, O‘zbekistonning Ukrainadagi elchixonasi mamlakatdagi o‘zbekistonlik fuqarolarni evakuatsiya qilish ishlari haqida qo‘shimcha ma’lumot bergandi.

Qayd etilishicha, fuqarolar Ukraina–Polsha chegarasini kesib o‘tishni boshlagan. Ukraina va Polsha chegarachilari, birinchi navbatda, ayollar va bolalarni o‘tkazmoqda.

Chegarani kesib o‘tish uzoq vaqt oladi. Birinchi guruh uchun bu jarayon 14 soat davom etgan. Lvovga ko‘p sonli qo‘shimcha evakuatsiya poyezdlari yetib kelgani hisobiga chegarani kesib o‘tish vaqti cho‘zilishi mumkin.