“Ekologiya sohasida hali yuqori standartlarga o‘tmadik” - Narzullo Oblomurodov bilan suhbat

Markaziy Osiyo mintaqasida, xususan O‘zbekistonda iqlim yomonlashayotgani, qurg‘oqchil hududlar ko‘payib, suv tanqisligi tobora sezilayotgani, iqlimiy sikllar o‘zgarib, yog‘ingarchiliklar vaqti va mavsumlar mutanosibligi o‘zgarib borayotgani, oqibatda sellar, ko‘chkilar, qumli bo‘ronlar kabi tabiat hodisalari soni ortib borayotgani har birimizni tashvishga solishi shart.

Ammo afsuski, hamma ham bu haqda o‘ylamayapti, hamma ham bu haqda qayg‘urmayapti. Kam sonli faollarning chaqiriqlariga esa doim ham quloq solishmayapti. Sohaga mas’ullar, qonun chiqaruvchi organlar, hukumat va faollar bir yoqadan bosh chiqarib, ekologiyamiz yomonlashuvining oldi olishi lozim bo‘lgan davrga yetib keldik.

Xo‘sh, sohaga bevosita javobgar bo‘lgan Ekologiya va atrof-muhitni muhofaza qilish davlat qo‘mitasi bu chaqiriqlarga qay darajada tayyor? Mavjud holatga, ehtimoliy va voqelikka aylanib bo‘lgan muammolarga qo‘mita qanday reaksiya qilyapti? Daraxtlar kesilib bo‘lgach, suv manbalari ifloslantirib bo‘lingach, Qizil kitobga kiritilgan hayvonlar o‘ldirib bo‘lingach reaksiya ko‘rsatadigan va jarima soladigan tashkilotga aylanib qolayotgandek taassurot uyg‘otayotgan tashkilotda qanday rejalar bor?

Ekoqo‘mita raisi Narzullo Oblomurodov bilan intervyu uyushtirishni anchadan beri niyat qilib, buning uchun bir necha bor urinib ko‘rdik, ammo ayrim sabablarga ko‘ra bu ish orqaga surib kelindi. Nihoyat, Toshkent shahri, Chilonzor tumanidagi daraxtkesarlik bilan bog‘liq shov-shuvli voqeadan so‘ng Ekoqo‘m raisi biz bilan uchrashdi. Unga o‘zimiz va jamoatchilikni qiynayotgan savollarni bera oldik.

Narzullo Oblomurodov qo‘mita raisligi lavozimidagi o‘tgan faoliyatidan qay darajada qoniqayotgani, xalq oldidagi hisobdorligi haqida to‘xtalib o‘tdi. O‘ziga nisbatan talabchan va faoliyatidagi kamchiliklarni tan olgan rais suhbat davomida qo‘mita tomondan amalga oshirilayotgan ishlarga ham to‘xtalib, ularni yoritib, xalqqa yetkazishda kamchiliklar bo‘lganini aytib o‘tdi.

Intervyu davomida biz O‘zbekistondagi hayvonot olami, unga bo‘layotgan tahdid, suv muammolari, “Yashil makon” dasturi, daraxtkushlik illati, havo va iqlim o‘zgarishi muammolari borasida savollar berdik. Shuningdek, so‘nggi paytlarda internet tarmog‘ida paydo bo‘lgan va shaxsan Oblomurodov obro‘siga putur yetkazishi mumkin bo‘lgan uning shaxsiy hamda xizmat avtomobillari, qo‘mita fondidan bank depozitiga qo‘yilgan pullar va ulardan o‘zi va qo‘l ostidagi rahbarlar foydalanyotgani kabi mish-mish gaplarga aniqlik kiritishga urindik.

Albatta, to‘liq ma’lumot va qiziqarli savol-javob uchun videointervyuni ko‘rishni tavsiya qilamiz.