Ўзбекистон бош вазири ўринбосари - инвестициялар ва ташқи савдо вазири Жамшид Хўжаев «Ўзчармсаноат» уюшмасига ташриф буюрди.
Ташриф давомида уюшма раҳбарияти чарм-пойабзал саноати ҳозирги ҳолати ва уни янада ривожлантириш истиқболлари тўғрисида тақдимотлар ўтказди.
Тери-пойабзал ҳамда жун ва мўйначилик саноати ривожланиш истиқболларини таҳлил қилиш жараёнида юқори сифатли хомашёни сотиб олиш, ишлаб чиқариш жараёнини оптималлаштириш, кластерларда, кичик саноат зоналарида лойиҳаларни амалга ошириш бўйича муаммолар ва таклифлар билдирилди.
Маҳсулот экспортини кўпайтириш, кадрлар тайёрлаш ва қайта тайёрлаш тизимини такомиллаштириш, корхоналар ихтисослаштирилган халқаро кўргазмаларда иштирок этиши, соҳадаги инновацион лойиҳаларни молиялаштириш, мамлакатда ва хорижий давлатларда йирик улгуржи савдо марказларини ташкил этишга тўхталиб ўтилди.
Муҳокамадан сўнг уюшма раҳбариятига билдирилган масалаларни батафсил ўрганиш ва соҳани ривожлантириш бўйича тадбирларни ишлаб чиқиш топширилди.
