Shu yil 9-21 avgust kunlari O‘zbekiston Muaytay federatsiyasi bir guruh yosh sportchilar bilan Malayziyaga o‘smirlar o‘rtasida jahon chempionatida qatnashish uchun borgan. Delegatsiya tarkibida bo‘lgan federatsiya rasmiylari musobaqalar davomida boshqa federatsiyalar va rasmiylar bilan muzokaralar o‘tkazish uchun pullik asosda tarjimon qidirib, Malayziyada uzoq vaqt ishlagan axborot xavfsizligi bo‘yicha mutaxassis Anvar Narzullayevga aloqaga chiqishadi.
Anvar Narzullayev federatsiya a’zolariga Malayziyadagi oliygohlardan birida ta’lim oluvchi o‘zbekistonlik R. ismli yigitni tavsiya qilgan.
Tarjimon yigit 11 kun davomida federatsiya a’zolariga hamrohlik qilib, jami 3 ta rasmiy muzokarada tarjimonlik qilganini bildirdi. Musobaqalar yakunlangach esa federatsiya bosh kotibi Jamshid Bekmurodov talaba yigitga vatanga yordam berganini, uni mehmonxonada ovqatlantirishganini aytib, ish haqini bermagan.
“Hamma ishimni tashlab, tarjimonlik qilish uchun keldim. 3 ta rasmiy muzokaralarda tarjimonlik qildim, bundan tashqari 24 soat davomida shu federatsiyadagilarda nima masala bo‘lsa: biror joyga borib kelish bo‘ladimi yoki biror narsa so‘rash, yordam berib turdim. Oxiriga kelganda, tarjimon uchun pul ajratilmagan edi, oldinroq aytganingda boshqasiga iltimos qilardik, deyishdi.
Xullas, “seni mehmonxonada olib yurdik, ovqatlantirdik, vatan uchun yordaming tekkaniga xursand bo‘lmaysanmi” deb, ketvorishdi. Men ham katta pul so‘ramadim, indamay qo‘ya qoldim. Aslida tarjimon va gidlik qiladiganlar kuniga 100 dollardan oladi, men jami 400 dollar degandim”, – deydi Kun.uz muxbiri bilan gaplashgan talaba.
Voqea – ushbu talabani tarjimonlikka tavsiya qilgan, aniqrog‘i o‘rtada turgan Anvar Narzullayev tomonidan jamoatchilikka oshkor qilingan. Post muhokamalarga sabab bo‘lgach, Muaytay federatsiyasi rasmiylari tarjimon yigitga aloqaga chiqib, postni o‘chirtirishni, masalani bir kunda hal qilishlarini aytgan.
Kun.uz muxbiri bilan gaplashgan O‘zbekiston Muaytay federatsiyasi bosh kotibi Jamshid Bekmurodovning aytishicha, Malayziyada haqiqatda ham tarjimon yigit bilan yuqoridagi hodisa sodir bo‘lgan.
“O‘zim ham, sheriklarim ham sal-pal ingliz tilini bilamiz, lekin muzokaralar o‘tkazish darajasida emas. Shuning uchun do‘stimdan tarjimon so‘ragan edim. U tavsiya qilgan kishilar orqali R. ismli talaba yigit bilan bog‘landik. U Xalqaro Muaytay federatsiyasi raisi bilan o‘tkazilgan yig‘ilishda bizga tarjimonlik qildi. Qolgan vaqtlarda asosan kunlik mayda-chuyda narsalarda ba’zi gaplarni tarjima qilib berdi, xolos.
