Navoiylik ayolni chuv tushirgan xavfli retsidivist 5 yilga qamaldi

Jinoyat ishlari bo‘yicha Qiziltepa tumani sudi raisi Adiz Avezovning Kun.uz’ga ma’lum qilishicha, fuqaro R.B. navoiylik ayolga o‘zini Alisher deb tanishtirib, guruch savdosi bilan shug‘ullanishini aytgan va uyida bir kecha tunab qolishni so‘ragan. U Xorazmdan yuk mashinasida guruch olib kelinayotgani, yukni qabul qilib olishi kerakligini va xarajatlar uchun mayda kupyurali puli yo‘qligini, yonida bo‘lgan 100 mln so‘m puli esa katta kupyurali ekanligini aytgan.

Shu tariqa ayolning ishonchiga kirgan firibgar unga qora paketga skochtlab o‘ralgan 100 mln so‘mni tutqazib, saqlab turishni so‘ragan hamda 18,5 mln so‘m pulini va bozor narxi 3 mln so‘m bo‘lgan uyali telefonini olib chiqib ketgan. “Savdogar” qaytavermagach, u qoldirib ketgan paket ochib ko‘rilganida, uning ichida 100 mln so‘m pul emas, 4 ta salfetka borligi ma’lum bo‘lgan.

Sud hukmi bilan R.B. Jinoyat kodeksining 168-moddasi (firibgarlik) 3-qismining “b” bandida nazarda tutilgan jinoyatni sodir qilganlikda aybli deb topilib, unga 5 yil muddatga ozodlikdan mahrum qilish jazosi tayinlangan. Shuningdek, undan ayol foydasi yetkazilgan 21,5 mln so‘m zararni undirish belgilangan.