Borrel: Yevropa ittifoqi «Shimoliy oqim» bo‘yicha kuchli va muvofiqlashtirilgan javob beradi

Yevropa ittifoqining yetakchi siyosatchilari «Shimoliy oqim-1» va «Shimoliy oqim-2» gaz quvurlarida gaz sizib chiqishini diversiya natijasi deb hisoblayapti. «Mavjud barcha dalillar bu qasddan qilingan harakatlar natijasi ekanini ko‘rsatmoqda. Biz tergovni har tomonlama qo‘llab-quvvatlaymiz, ushbu hodisalar holatlari va sabablari har tomonlama oydinlashtiriladi», - dedi Yevropa ittifoqining tashqi ishlar va xavfsizlik siyosati bo‘yicha oliy vakili Jozep Borrel 28 sentabr, chorshanba kuni Yevropa ittifoqiga a’zo 27 davlat nomidan.

Borrelning so‘zlariga ko‘ra, Yevropa ittifoqi surishtiruv natijalariga ko‘ra «kuchli va muvofiqlashtirilgan javob» beradi va «energetika xavfsizligi barqarorligini mustahkamlash bo‘yicha keyingi qadamlarni qo‘yadi». Shu bilan birga, Yevropa bosh diplomati gaz quvurlariga zarar yetkazishda kim aybdor bo‘lishi mumkinligi haqida o‘z taxminini aytmadi.

Yevropa kengashi rahbari Sharl Mishel «Shimoliy oqim»dagi gaz sizib chiqishini Yevropa ittifoqiga energiya ta’minotini yanada beqarorlashtirishga qaratilgan sabotaj natijasi deb atadi. «Biz shoshilinch va puxta surishtiruv o‘tkazishimiz kerak. Aybdorlar to‘liq javobgarlikka tortiladi va sodir bo‘lgan voqea uchun tovon to‘laydi. Rossiya gazidan voz kechishimizga imkon beruvchi energiya ta’minotini diversifikatsiya qilishga urinishlar davom etadi», deb yozdi u Twitter’dagi mikroblogida.

Yevropa komissiyasi raisi Ursula fon der Lyayyen kuni kecha Daniya bosh vaziri Mette Frederiksen bilan «sabotaj akti»ni muhokama qilgan va u unga sizib chiqish tasodif emas, qasddan qilingan harakat natijasi ekanligini aytgan. O‘z navbatida, Shvetsiya bosh vaziri Magdalena Anderson «portlashlar» haqida xabar berdi. 

26 sentabrga o‘tar kechasi «Shimoliy oqim-1» va «Shimoliy oqim-2» quvurlarida yirik sizib chiqish ro‘y bergani ma’lum bo‘ldi. Rossiya magistrallarni tiklash uchun qancha vaqt ketishi hozircha ma’lum emasligini ta’kidladi va sodir bo‘lgan voqeadan chuqur tashvish bildirdi. 

Ayni paytda, Polsha bosh vaziri Mateush Moravetskiy «Shimoliy oqim»dagi sabotaj akti»ni Ukraina atrofidagi mojaro avj olishidagi navbatdagi bosqich deb atadi.