Shvetsiya qirg‘oq qo‘riqlash xizmati gaz quvurlarida yana bir shikastlangan joyni aniqladi. To‘rtta sizib chiqish joyidan ikkitasi Shvetsiyaning maxsus iqtisodiy zonasida joylashgan.
Shvetsiya qirg‘oq qo‘riqlash xizmati shikastlangan «Shimoliy oqim» va «Shimoliy oqim-2» quvurlaridan navbatdagi gaz sizib chiqishini aniqladi, deb xabar bermoqda Shvetsiyaning Svenska Dagbladet gazetasi 29 sentabr, payshanba kuni. Sohil qo‘riqlash xizmati vakili gazetaga bergan intervyusida: «To‘rtta sizib chiqish joyidan ikkitasi Shvetsiyaning maxsus iqtisodiy zonasida joylashgan», dedi. Yana ikkita sizib chiqish Daniyaning maxsus iqtisodiy zonasida qayd etildi.
Shvetsiya dengiz ma’muriyati ma’lumotlariga ko‘ra, «Shimoliy oqim-2» gaz quvurida yangi sizib chiqish aniqlangan. Sizib chiqish joyidan sirtga chiqayotgan gaz pufakchalari maydonining diametri 200 metrni tashkil qiladi. «Bu sizib chiqish boshidan ma’lum emas edi. Gaz pufakchalari buluti radarda ko‘rinmayotgandi, chunki u boshqalariga qaraganda kichikroq. Sohil qo‘riqlash xizmati kema va samolyotda hududni o‘rganayotganda buni ko‘rgan», - dedi Shvetsiya dengiz ma’muriyati vakili.
O‘z navbatida, «Shimoliy oqim»dan gaz sizib chiqish hududlarida avvalroq ikkita portlash sodir bo‘lgani haqida xabar bergan shved seysmologi Byorn Lund Aftonbladet gazetasiga uchta portlash bo‘lgan bo‘lishi mumkinligini aytdi. Bu ikkinchi portlashdan keyin seysmik to‘lqinlarning holati bilan ko‘rsatilgan. Uchinchi portlash undan 10 soniya o‘tib sodir bo‘lgan bo‘lishi mumkin edi, deydi Lund.
«Shimoliy oqim»ning ikkita tarmog‘i va «Shimoliy oqim-2» bitta tarmog‘ida gaz sizib chiqishi 26 sentabr kuni ma’lum bo‘ldi. Yevropa ittifoqi rasmiylari quvurlar ataylab shikastlangan deb hisoblayapti. Hodisalar Germaniya, Daniya va Shvetsiyada tekshirilmoqda. Nemis razvedka idoralari bu g‘avvos yoki suvosti kemasi yordamida sabotaj bo‘lganini taxmin qilmoqda. Ularning fikriga ko‘ra, gaz quvurlari tezda ta’mirlanmasa, ular doimiy ravishda ishdan chiqishi mumkin.
Sky News telekanali Britaniya Mudofaa vazirligidagi manbaga tayanib, gaz quvuriga zarar yetkazgan portlovchi qurilmalar bir necha oylar, hatto yillar oldin o‘rnatilgan bo‘lishi mumkinligini ma’lum qildi. Buni kim va nima uchun qilgani hozircha noma’lum.
Der Tagesspiegel gazetasining yozishicha, Germaniya razvedka idoralari portlashlarni Rossiya, Ukraina yoki ukrainparast kuchlar uyushtirganlikda gumon qilmoqda. Ayni paytda, Rossiya FXX gaz quvurlariga shikast yetkazilganligi sababli xalqaro terrorizm to‘g‘risidagi ishni ochdi.
