O‘zbekiston «Aqlli shahar» platformasini ishlab chiquvchi Malayziya kompaniyasi bilan hamkorlik qiladi

O‘zbekiston diplomatiya missiyasi xodimlari 27-29 sentabr kunlari Malayziyada bo‘lib o‘tayotgan SmartNation-2022 xalqaro ko‘rgazmasida ishtirok etyapti, deb xabar qildi «Dunyo».

Ko‘rgazma 2009 yildan beri har yili Kuala-Lumpurda o‘tkaziladi. Unda 25 dan ortiq mamlakatdan 500 ga yaqin kompaniyalar o‘zlarining mingdan ortiq innovatsion texnologiyalari va yechimlarini namoyish etadi.

Tadbir davomida axborot texnologiyalari sohasidagi yetakchi Malayziya kompaniyalari bilan muzokaralar ham o‘tkazildi. «Aqlli shahar» platformasini ishlab chiqarishga ixtisoslashgan Kiwitech, innovatsion texnologiyalar asosida tibbiyot jihozlari ishlab chiqarishga ixtisoslashgan PBUMed va dasturiy ta’minot ishlab chiqaruvchisi - Advanced Microelectronic Solution-AMS Sdn Bhd kompaniyalari O‘zbekiston bilan hamkorlik qilishga qiziqish bildirdi.

SmartNation-2022 axborot texnologiyalari, robototexnika, sun’iy intellekt, 5G texnologiyalari, qishloq xo‘jaligi, sanoat, moliya va ta’lim sohalarida qo‘llaniladigan dasturiy ta’minotlar sohasidagi eng so‘nggi innovatsiyalar xalqaro ko‘rgazmasi hisoblanadi.