Malayziyaning Paxang shtati Raub tumanidagi Klau daryosida yana bir piranya tutildi. Bu haqda atrof-muhitni muhofaza qilish bilan shugʻullanuvchi Jejak Air Tawar tashkiloti xabar berdi.
Dastlabki baholashlarga koʻra, tutilgan baliq oddiy yoki qizil qorinli piranya - Pygocentrus nattereri turiga mansub boʻlishi mumkin. Ushbu turning tabiiy yashash hududi Janubiy Amerika daryolari hisoblanadi. Malayziya suv havzalarida esa piranyalar mahalliy tur emas va invaziv organizm sifatida baholanadi.
Birinchi piranya 26-avgust kuni Klau toʻgʻoni yaqinida baliqchilar toʻriga tushgan edi. Oradan bir oyga yaqin vaqt oʻtib, xuddi shu hududdagi daryodan ikkinchi shunga oʻxshash baliq tutildi.
Malayziya Baliqchilik departamenti mamlakat suv havzalarida qizil qorinli piranyalarning barqaror populyatsiyasi mavjudligi haqida hozircha maʼlumot yoʻqligini bildirdi. Shu sababli ikki baliqning tutilishi ularning daryoda koʻpayib ketganini tasdiqlamaydi. Biroq qisqa vaqt ichida ikkita namuna aniqlangani mutaxassislarda jiddiy xavotir uygʻotgan.
Birinchi baliqni oʻrganish imkoni boʻlmagan
Avgust oyida tutilgan birinchi baliq faqat surat orqali oʻrganilgan. Mutaxassislar tashqi belgilariga qarab uni Pygocentrus turkumiga kiritgan, biroq faqat fotosurat asosida baliqning aniq turini kafolatli belgilash mumkin emasligi qayd etilgan.
Baliqni tutgan shaxs uning nobud boʻlgani va keyinchalik tashlab yuborilganini aytgan. Shuning uchun mutaxassislar birinchi namunani bevosita tekshirish, oʻlchamlarini qayd etish yoki genetik tahlil oʻtkazish imkoniga ega boʻlmagan.
Ikkinchi holatda Jejak Air Tawar vakillari baliqchi bilan bogʻlanib, undan bir nechta surat va videolarni olgan. Materiallarni oʻrgangan mutaxassislar ikkinchi baliq ham avvalgisi bilan bir turga mansub, degan dastlabki xulosaga kelgan.
Piranyalarni kimdir suvga qoʻyib yuborgan boʻlishi mumkin
Ekologlarning taxminicha, piranyalarni kimdir ataylab yoki ehtiyotsizlik oqibatida suv havzasiga tashlab yuborgan. Biroq ular toʻgʻridan toʻgʻri daryoga qoʻyib yuborilganmi yoki avval Klau suv omboriga tashlanganmi - hozircha nomaʼlum.
Suv havzasiga nechta piranya chiqarib yuborilgani ham aniq emas. Jejak Air Tawar tashkiloti vakillarining taʼkidlashicha, bunday baliqlar koʻpincha yakka emas, balki bir guruh holda qoʻyib yuboriladi. Shuning uchun daryoda yana boshqa piranyalar boʻlishi ehtimoli istisno qilinmayapti.
