O‘zbekistonning Malayziyadagi elchixonasi vakillari ushbu mamlakat Migratsiya departamenti bosh direktori o‘rinbosari Aminudin bin Yahaya bilan uchrashdi. Bu haqda «Dunyo» axborot agentligi xabar berdi.
Uchrashuvda O‘zbekiston fuqarolari uchun Malayziyada 30 kungacha amal qiladigan vizasiz tartibni yanada soddalashtirish hamda uzoq muddatli vizalarni rasmiylashtirish jarayonlarini yengillashtirish imkoniyatlari ko‘rib chiqildi.
O‘zbekiston tomoni mamlakat fuqarolari vizasiz kirishi mumkin bo‘lgan davlatlar sonini kengaytirish va viza jarayonlarini liberallashtirish bo‘yicha amalga oshirilayotgan ishlar haqida ma’lumot berdi. Shuningdek, xavfsiz tashqi mehnat migratsiyasini tashkil etish, xorijda ishlayotgan va tahsil olayotgan o‘zbekistonliklarni qo‘llab-quvvatlash choralari xususida so‘z yuritildi.
Qayd etilishicha, so‘nggi yillarda O‘zbekiston dunyoning 93 dan ortiq mamlakati fuqarolari uchun vizasiz tartib joriy etgan. Yana 70 dan ziyod davlat fuqarolari uchun elektron viza tizimi yo‘lga qo‘yilgan.
Tomonlar O‘zbekiston va Malayziya rahbarlarining o‘zaro tashriflari doirasida erishilgan kelishuvlar natijasida savdo-iqtisodiy, turizm, ta’lim va madaniy-gumanitar sohalardagi aloqalar faollashib borayotganini ham ta’kidladi.
Aminudin bin Yahaya so‘nggi yillarda ikki mamlakat o‘rtasida sayyohlar oqimi ortib borayotganini qayd etdi. Malayziya Migratsiya departamenti ma’lumotiga ko‘ra, mamlakatda qonuniy bo‘lib turish uchun ruxsatnoma olgan O‘zbekiston fuqarolari soni ham ko‘paymoqda.
O‘zbekistonliklar Malayziyaga asosan ta’lim olish hamda malakali mutaxassis sifatida mehnat faoliyati bilan shug‘ullanish maqsadida borayotgani bildirildi.
