Yaponiyada dissertatsiya yoqlab kelgan olim Iskandar Abdullayev O‘zbekistonda biologik tadqiqotlar o‘tkazish uchun Jahon bankidan yirik miqdordagi grant yutgan. Mablag‘larni olishda O‘zbekiston tomonida muammo bo‘layotgani aytilmoqda.
21 oktyabr kuni Iskandar Abdullayevning onasi falsafa va siyosiy fanlar doktori Gulsara Shermatova Facebook’dagi sahifasida o‘g‘li Iskandar Abdullayev Jahon bankidan 600 ming dollarlik grant yutib, mablag‘larni ololmayotgani haqida post joyladi.
Unda aytilishicha, Iskandar Abdullayev 3 oy oldin biologik tadqiqotlarini o‘tkazish, asbob-uskunalar sotib olish va tadqiqot guruhini tuzish uchun Jahon bankining 600 ming dollarlik grantini yutib olgan. Biroq mablag‘lar hali yetib kelmagan.
Iskandar Abdullayev Yaponiyada fan nomzodi dissertatsiyasini himoya qilgan va AQSh tadqiqot markazida ishlab, tadqiqotlar o‘tkazish uchun O‘zbekistonga kelgan.
Gulsara Shermatovaning yozishicha, Jahon banki Innovatsion rivojlanish vazirligi bilan O‘zbekistonda yirik loyiha amalga oshiryapti. Bu loyihaning tarkibiy qismi sifatida turli sohalarga grantlar ajratilyapti. Bu grant Milliy Universitet qoshidagi guruhga ajratilgan.
“Shu bois bu ish bilan Oliy va o‘rta maxsus ta’lim vazirligining investitsiya va tashqi aloqalar bo‘limi shug‘ullanishi kerak. Tushunishimcha, Markaziy bankning tegishli bo‘limiga, vazirlik hujjatlarni tasdiqlab jo‘natishi kerak. Konvertatsiya qilinib, ilmiy muassasa hisobraqamiga o‘tkazilishi kerak. Ammo 2,5 oydan beri bu ish paysalga solinyapti. Bunday cho‘zaverishsa, Jahon banki pulni qaytarib oladi. Investitsiyalar masalasi xalqaro siyosiy maydonga chiqadi. Bu muammolar O‘zbekistonning xalqaro reytingi bilan bog‘liq muammolar. Bunaqa hodisa bir-ikki marta takrorlansa, keyin Jahon banki O‘zbekistonga grant bermay qo‘yadi”, – deydi olimning onasi Kun.uz bilan suhbatda.
Post muallifi Oliy va o‘rta ta’lim vazirligiga murojaat qilishgani, vazirlik ularda Moliya vazirligining grant mablag‘laridan foydalanish bo‘yicha ko‘rsatmalari yo‘qligini bildirganini ham ma’lum qilgan. Moliya vazirligi esa buni Oliy va o‘rta maxsus ta’lim vazirligi hal qilishini aytgan.
Kun.uz voqeaga oydinlik kiritish maqsadida Oliy va o‘rta ta’lim vazirligi bilan bog‘landi. Vazirlikning ma’lum qilishicha, holat yuzasidan Jahon bankining O‘zbekistondagi vakillariga so‘rov yuborilgan.
“Aynan qayerda muammo bo‘lgani aniq emas. Bu masala o‘rganilyapti. Aniqlangandan keyin rasmiy sahifalarimizda e’lon qilamiz. Bunday grantlarning O‘zbekistonga kelishi, tadqiqot ishlari olib borilishi vazirligimiz uchun ham foydali”, – deydi vazirlik matbuot xizmati vakili.
25 oktyabrda xabarga qo‘shilgan qo‘shimcha ma’lumot: Mazkur xabar saytimizda e’lon qilinganidan so‘ng, biofizik Iskandar Abdullayev tahririyat bilan bog‘lanib, Jahon banki grantini olish masalasini Moliya vazirligi va Oliy va o‘rta maxsus ta’lim vazirliklari hal qilib berganini ma’lum qildi.
