Bu haqda Jahon bankining Yevropa va Markaziy Osiyo iqtisodiyotiga bagʻishlangan 2026-yil oktabrdagi hisobotida maʼlum qilingan.
Hisobotga koʻra, Oʻzbekistonda iqtisodiy oʻsishni real ish haqining oshishi, bandlikning kengayishi va xorijdan pul oʻtkazmalari qoʻllab-quvvatlamoqda. Infratuzilma, energetika va uy-joy qurilishiga investitsiyalar ham muhim omil boʻlib qolmoqda.
Bank baholashicha, Oʻzbekistonda 2025-yildagi 7,7 foizlik oʻsishdan soʻng joriy yilda koʻrsatkich 7,9 foizga yetadi. Keyingi yillarda oʻsish surʼati biroz sekinlashishi kutilmoqda: 2027-yil uchun 7,5 foiz, 2028-yil uchun esa 7,1 foizlik prognoz berilgan.
2026-yilgi baholar boʻyicha Oʻzbekiston hisobotda qamrab olingan Markaziy Osiyo mamlakatlari orasida Qirgʻizistondan keyin ikkinchi oʻrinda. Qirgʻiziston iqtisodiyoti 9,6 foizga, Tojikistonniki 7,5 foizga, Qozogʻistonniki esa 4,6 foizga oʻsishi kutilmoqda.
Markaziy Osiyo boʻyicha umumiy oʻsish 5,8 foiz darajasida baholangan. Shu tariqa, Oʻzbekistonning kutilgan koʻrsatkichi submintaqa oʻrtachasidan 2,1 foiz band yuqori.
Jahon banki Markaziy Osiyo Yevropa va Markaziy Osiyo mintaqasining eng tez oʻsayotgan qismi boʻlib qolishini qayd etgan. Bunga kuchli ichki talab va davlat investitsiyalarining koʻpayishi yordam bermoqda.
Ayni paytda, hisobot qamrab olgan Yevropa va Markaziy Osiyoning rivojlanayotgan iqtisodiyotlarida umumiy oʻsish 2025-yildagi 2,6 foizdan 2026-yilda 2,2 foizgacha sekinlashishi kutilmoqda.
Keltirilgan raqamlar yil yakuni boʻyicha tasdiqlangan natijalar emas, Jahon bankining baholari va prognozlaridir.
