Eronda birgina mamlakat poytaxtida bo‘lib o‘tgan hukumatga qarshi namoyishlarda qatnashgan 300 dan ortiq odamga ayblov qo‘yildi. Sud organlari ma’lumotlariga ko‘ra, ularning ba’zilari o‘lim jazosiga mahkum etilishi mumkin.
Eronda davom etayotgan namoyishlar chog‘ida qo‘lga olingan to‘rt kishi o‘lim jazosiga hukm qilinishi mumkin. Ular Eron qonunchiligiga ko‘ra o‘ta og‘ir jinoyat sifatida baholanadigan va o‘lim bilan jazolanishi mumkin bo‘lgan «moxareb» – «Yaratganga qarshi urush»da ayblanmoqda. Bu haqda Tehron bosh prokurori Ali Solihiy 25 oktyabr, seshanba kuni xabar qildi.
Solihiyning Misan Online sud portali tomonidan keltirilgan so‘zlariga ko‘ra, to‘rt «isyonchi» shuningdek, noqonuniy qurol olib yurish, huquq-tartibot idoralari xodimlarini jarohatlash, mamlakat xavfsizligiga putur yetkazish, davlat mulkini yo‘q qilish va o‘t qo‘yishda ayblanmoqda.
Eron poytaxtida jami 315 kishiga «mamlakat xavfsizligiga putur yetkazish maqsadida yig‘ilish va til biriktirish», «hukumatga qarshi targ‘ibot olib borish» hamda «jamoat tartibi va tinchligini buzish» ayblovlari qo‘yildi, dedi Solihiy. Eronning Alborz viloyati Bosh prokuraturasi rahbari Husayn Fazeli-Xarikandi yana 200 ga yaqin namoyishchilarga nisbatan ayblov qo‘yilganini ma’lum qildi.
Erondagi ommaviy norozilik namoyishlari sentabr oyi o‘rtalaridan beri tinmayapti. Bunga 22 yoshli kurd qiz Mahsa Aminiyning o‘limi sabab bo‘lgan. U 13 sentabr kuni Tehronda politsiya tomonidan hibsga olingan va bir necha kundan keyin vafot etgan. Politsiyaning ta’kidlashicha, qiz bo‘limda o‘zini yomon his qilgan, u yerdan kasalxonaga olib ketilgan va u yerda tez orada vafot etgan. Yaqinlarining so‘zlariga ko‘ra, o‘limga hibsga olish vaqtidagi kaltaklar sabab bo‘lgan.
Eronning 100 ga yaqin shahrida norozilik namoyishlari davom etmoqda. Namoyishchilar dastlab Aminiyning o‘limida aybdorlarning tergov qilinishi va jazolanishini talab qilgan bo‘lsa, vaqt o‘tishi bilan shiorlar ijtimoiy-siyosiy shiorlarga, jumladan, rejimni o‘zgartirishga chaqiriqlarga o‘zgardi. Oktabr oyi o‘rtalarida norozilik namoyishlariga neftchilar qo‘shildi.
Mamlakat hukumati norozilik namoyishlarini xorijdan uyushtirilgan deb ayovsiz bostirishda davom etmoqda. OAV xabarlariga ko‘ra, oktabr oyi o‘rtalarida 1,5 mingga yaqin namoyishchi: ayollar harakati faollari, rassomlar, muxolifat siyosatchilari, sportchilar, talabalar hibsga olingan.
Namoyishlar chog‘ida, Erondagi Inson huquqlari tashkiloti, shuningdek, Human Righs Watch inson huquqlari tashkiloti ma’lumotlariga ko‘ra, 200 dan ortiq odam, jumladan, 23 bola halok bo‘lgan.
