Internet sifati va tezligini o‘lchash bo‘yicha milliy axborot tizimi joriy qilinadi 

“Internet xizmatlari sifati va uzatish tezligini o‘lchash bo‘yicha milliy axborot tizimini joriy qilish to‘g‘risida”gi hukumat qarori loyihasi e’lon qilindi.

Prezident qaroriga muvofiq xo‘jalik yurituvchi sub’yektlar tomonidan foydalanuvchilarga taqdim etilayotgan ma’lumotlar uzatish tarmoqlarida internet xizmatlari sifati va uzatish tezligini o‘lchash bo‘yicha vazifa belgilangan.

Axborotlashtirish sohasida nazorat bo‘yicha davlat inspeksiyasi va Axborot texnologiyalari vazirligining xo‘jalik yurituvchi sub’yektlar tomonidan foydalanuvchilarga taqdim etilayotgan “Internet xizmatlari sifati va uzatish tezligini o‘lchash - teznet.uz” milliy axborot tizimini joriy etish to‘g‘risidagi taklifiga rozilik beriladi.

Axborotlashtirish sohasida nazorat bo‘yicha davlat inspeksiyasi Axborot texnologiyalari vazirligi bilan birgalikda:

• 2023 yil 1 fevralga qadar, ma’lumotlarni uzatish, shu jumladan Internet xizmatlari sifati va uzatish tezligini o‘lchash bo‘yicha xalqaro tajribani o‘rganadi;
• 2023 yil 10 iyulga qadar teznet.uz milliy axborot tizimi texnik hujjatlari ishlab chiqilishini hamda belgilangan tartibda ekspertizadan o‘tkazilishini;
• 2023 yil 1 sentabrga qadar teznet.uz milliy axborot tizimini dastlabki bosqichda sinov tarzda ishga tushirilishini ta’minlaydi.

2023 yil 1 noyabrga qadar davlat standartlari hamda axborot va kiberxavfsizlik talablarini inobatga olgan holda, teznet.uz milliy axborot tizimi veb-servis va mobil ilovasi ishlab chiqilishi va joriy etilishini ta’minlaydi.

Bunda:

• teznet.uz milliy axborot tizimi veb-servis va mobil ilovasi ochiq manbalarda joylashtiriladi hamda tizim orqali internet tarmog‘iga ulangan abonentlik qurilmalari yordamida internet xizmatlari sifati va uzatish tezligini mustaqil o‘lchash imkoniyati yaratiladi;
• teznet.uz milliy axborot tizimi orqali amalga oshirilgan o‘lchov va tahlil natijalari, ma’lumotlarni uzatish va mobil aloqa tarmoqlarida ko‘rsatiladigan internet xizmatlari sifati ko‘rsatkichlarini baholash uchun asos hisoblanadi;
• respublika hududida faoliyat ko‘rsatayotgan operator va provayderlar tomonidan foydalanuvchilarga taqdim etilayotgan internet xizmatlari sifatini va uzatish tezligini o‘lchash ishlari teznet.uz milliy axborot tizimi orqali amalga oshiriladi;
• jamoatchilik nazorati ko‘lamini kengaytirish bo‘yicha axborot tizimi veb-servis havolasini va mobil ilovasini ochiq manbalarda hamda internet xizmatlarini ko‘rsatuvchi kompaniyalar rasmiy saytlarida joylashtirilishini ta’minlaydi.