Qarshi shahar kengashi deputati budjet mablag‘larini talon-toroj qilishda gumonlanmoqda

Avvalroq, Kun.uz’da Qarshi shahar prokuraturasining deputatni daxlsizlik huquqidan mahrum qilish haqidagi taqdimnomasi shahar kengashi tomonidan rad etilgani haqida xabar berilgandi. Qashqadaryo viloyat prokuraturasi matbuot xizmati deputat qanday jinoyatni sodir etganlikda gumonlanayotganini ochiqladi.

Ma’lum qilinishicha, hukumatning 2020 yil 10 yanvardagi 16-sonli Qaroriga asosan Respublika ixtisoslashtirilgan Onkologiya va radiologiya ilmiy-amaliy tibbiyot markazi Qashqadaryo filiali va “Obmur” MChJ o‘rtasida issiq oziq-ovqat mahsulotlari bilan ta’minlash maqsadida autsorsing xizmati uchun shartnoma tuzilgan.

Mazkur shartnomaga asosan “Obmur” MChJ tomonidan filialdagi bemorlarga 2020, 2021 va 2022 yilning o‘tgan 4 oyi davomida autsorsing xizmati asosida tayyor issiq oziq-ovqat mahsulotlari tarqatilgan.

O‘sha davrlardagi taomnomalar bilan hisob-fakturalarni taqqoslab, bank hisob-varaqasiga asosan tahlil qilinganda amalda taomnomadagi haqiqiy xarajatlarga nisbatan ortiqcha xarajatga yo‘l qo‘yilib, filial mansabdor shaxslari va boshqalar tomonidan budjet mablag‘lari talon-toroj qilingani aniqlangan.

Shundan so‘ng filial hamda Qarshi shahridagi “Obmur” MChJ mansabdor shaxslariga nisbatan Jinoyat kodeksining 167-moddasi 3-qismi “a” bandi bilan jinoiy ish qo‘zg‘atilgan.

Mazkur jinoyat ishi yuzasidan aniqlangan 198 mln so‘m pul mablag‘i naqd pul ko‘rinishida viloyat prokuraturasi depozit hisob raqamiga undirilishi ta’minlangan.

2022 yil 2 noyabr kuni Respublika ixtisoslashtirilgan Onkologiya va radiologiya ilmiy-amaliy tibbiyot markazi Qashqadaryo filiali sobiq bosh shifokori, deputat Adham Parmonovni jinoiy javobgarlikka tortishga, ehtiyot chorasi tanlash va daxlsizlik huquqidan mahrum qilishga rozilik olish to‘g‘risida Xalq deputatlari Qarshi shahar Kengashiga taqdimnoma kiritilgan.

2022 yil 16 noyabr kuni xalq deputatlari Qarshi shahar kengashi shahar prokuraturasining taqdimnomasini ko‘rib chiqqan va u bo‘yicha qaror qabul qilgan. Qarorda Qarshi shahar prokuraturasining deputat A.Parmonovni javobgarlikka tortishga, ehtiyot chorasi tanlash va daxlsizlik huquqidan mahrum qilishga rozilik olish haqidagi taqdimnomasi rad etilgan.