DW nashrining Finlandiyadagi Yle axborot xizmatiga tayanib xabar berishicha, bu holatlarning barchasi 2026-yil davomida kuzatilgan. Voqealar haqida 1-oktabr kuni maʼlum qilingan.
Deputatlarning aytishicha, ular yoʻqligida xususiy uylari va kvartiralariga kimdir kirganini koʻrsatuvchi belgilarni payqagan. Xususan, ayrim xonadonlarda kirish eshiklari ochiq yoki chiroqlar yoniq boʻlgan.
Shu bilan birga, qulf yoki eshiklarni buzib kirish izlari aniqlanmagan. Dastlabki maʼlumotlarga koʻra, uylardan hech narsa oʻgʻirlanmagan va buyumlarga zarar yetkazilmagan.
Bunday holatga duch kelgan deputatlarning aniq soni ochiqlanmagan. Yle maʼlumotiga koʻra, ularning soni 20 nafardan kam.
Belgilar ataylab qoldirilgan boʻlishi mumkin
Hozircha ehtimoliy kirishlar ortida kim turgani va bundan qanday maqsad koʻzlangani maʼlum emas.
Finlandiya parlamenti spikeri Yussi Xalla-axo uylardagi belgilar ataylab qoldirilgan boʻlishi mumkinligini istisno qilmagan.
«Ehtimol, bu taxmin qilinayotgan kirish holatlarida muayyan umumiy belgilar takrorlanayotgandir», - degan u 1-oktabrdagi matbuot anjumanida.
Bosh vazir xorijiy kuchlar ishtirokini istisno qilmadi
Finlandiya bosh vaziri Petteri Orpo voqealarga xorijiy kuchlar aloqador boʻlishi mumkinligini aytgan. Biroq hozircha bunday ishtirokni tasdiqlovchi maʼlumot keltirilmagan.
«Agar kimdir Finlandiyadagi barqarorlikni izdan chiqarishga, xavfsizlik hissimizni yoki, masalan, Ukrainani qoʻllab-quvvatlashimizni susaytirishga urinsa, bu teskari natija beradi», - degan Orpo.
U Moskva avval ham Yevropadagi saylovlarga aralashishga uringanini eslatgan. Finlandiyada navbatdagi parlament saylovlari 2027-yil aprel oyida oʻtkazilishi kutilmoqda.
Politsiya tergov boshladi
Helsinki politsiyasi deputatlarning xususiy turar joylariga kirish holatlari yuzasidan dastlabki tergov boshlanganini tasdiqlagan. Tergov Milliy tergov byurosi koʻmagida olib borilmoqda. Hozircha qoʻshimcha tafsilotlar ochiqlanmagan.
