Oliver Birhoff Germaniya futbol ittifoqi menejyeri lavozimini tark etdi

Germaniya futbol ittifoqi (DFB) menejyeri Oliver Birhoff Germaniya terma jamoasi Qatardagi jahon chempionatida kurashdan chiqib ketganidan to‘rt kun o‘tib, iste’foga chiqishini e’lon qildi. 54 yoshli Birhoff 18 yil davomida DFB rasmiysi sifatida ishlagan. 5 dekabr, dushanba kuni tomonlar uning 2024 yilda tugaydigan shartnomasini muddatidan oldin bekor qilishga kelishib oldi.  

«Ketishim bilan men yangi marralarni belgilashga yo‘l ochaman. Biz ishonch hosil qilgan ba’zi qarorlarimiz o‘zini oqlamadi. Bundan mendan ko‘ra hech kim ko‘proq afsuslanmaydi. Buning uchun mas’uliyatni o‘z zimmamga olaman», - dedi Birhoff. Shu tariqa, nemis futbol funksioneri Germaniya terma jamoasi 2022 yilgi jahon chempionatida kurashdan chiqib ketganidan so‘ng aytgan o‘z so‘zlarini biroz to‘g‘riladi: u DFB’ning navbatdagi asosiy maqsadi 2024 yilgi Yevropa chempionatiga tayyorgarlik bo‘lishini aytgandi.  

Oliver Birhoff 2004 yilda Germaniya futbol ittifoqiga ishga kelgan. O‘shanda uning uchun Germaniya asosiy milliy jamoasining yangi sport menejyeri lavozimi joriy etildi, rasmiy ravishda u «terma jamoalar va akademiya menejyeri» deb nomlandi. U milliy jamoa ustozi Yurgen Klinsmann bilan birgalikda ikki yildan so‘ng Germaniyada bo‘lib o‘tgan jahon chempionatida jamoani muvaffaqiyatga olib keldi, o‘shanda bu voqeaga «yozgi ertak» nomi berilgandi: Germaniya terma jamoasi ushbu chempionatda uchinchi o‘rinni egalladi. Sakkiz yil o‘tib, Birhoff va bosh murabbiy Yoaxim Lyov bilan birgalikda bundestim Braziliyada bo‘lib o‘tgan jahon chempionatida g‘olib chiqdi.