O‘zbekiston investitsiyalar va tashqi savdo vazirligida vazir birinchi o‘rinbosari Nozim Xolmurodov boshchiligida tarmoq birlashmalari, tijorat banklari, mahalliy hokimiyat organlari rahbarlari ishtirokida videoselektor yig‘ilishi bo‘lib o‘tdi, deb xabar bermoqda «Dunyo».
Yig‘ilishda tijorat banklari va viloyatlar mas’ul rahbarlari, mamlakat hududlaridagi sanoat korxonalari faoliyatini o‘rganish natijalari bo‘yicha respublika ishchi guruhlari rahbarlari hisobotlari tanqidiy ruhda tinglandi.
Ishchi guruhlar tomonidan 45 mingdan ortiq sanoat korxonasi faoliyati o‘rganilib, ular 5 mingtasida turli muammolar aniqlandi hamda ularni tezkor hal etish bo‘yicha manzilli «Yo‘l xaritalari» ishlab chiqildi. 1700 ta korxona kredit mablag‘larini olishda, 1300 ta korxona tegishli infratuzilmaviy kommunikatsiyalariga ulanishda muammolarga duch kelgan.
Yig‘ilish yakunlari bo‘yicha tegishli rahbarlarga «Yo‘l xaritalari»ni o‘z vaqtida amalga oshirish va har bir hudud salohiyatidan kelib chiqib, qo‘shimcha istiqbolli investitsiya loyihalarini ishlab chiqish bo‘yicha aniq topshiriqlar berildi.
