Milliy statistika qo‘mitasi ma’lumotlariga ko‘ra, 2026-yilning birinchi yarmida respublika bo‘yicha jami 637,2 trillion so‘mlik sanoat mahsulotlari ishlab chiqarilgan.
Hududlar kesimida eng yuqori ko‘rsatkich Navoiy viloyatida qayd etildi. Viloyatda yanvar–iyun oylarida 155 trillion so‘mlik sanoat mahsuloti ishlab chiqarilgan.
Ikkinchi o‘rinni 109,6 trillion so‘mlik ko‘rsatkich bilan Toshkent shahri egallagan. Kuchli uchlikni 100 trillion so‘mlik sanoat mahsuloti ishlab chiqargan Toshkent viloyati yakunlagan.
Keyingi o‘rinlarda Andijon viloyati - 54,2 trillion so‘m, Samarqand viloyati - 32,7 trillion so‘m va Farg‘ona viloyati - 29,6 trillion so‘mlik ko‘rsatkich bilan qayd etilgan.
Shuningdek, Buxoro viloyatida 26,3 trillion so‘m, Qashqadaryo viloyatida 25,5 trillion so‘m, Jizzax va Namangan viloyatlarining har birida 20,3 trillion so‘mlik sanoat mahsulotlari ishlab chiqarilgan.
Xorazm viloyatida bu ko‘rsatkich 18 trillion so‘mni, Qoraqalpog‘iston Respublikasida 15 trillion so‘mni, Sirdaryo viloyatida 13,8 trillion so‘mni tashkil etgan.
Ro‘yxatda eng past ko‘rsatkich Surxondaryo viloyatida qayd etilgan - hududda olti oy davomida 9,6 trillion so‘mlik sanoat mahsuloti ishlab chiqarilgan.
