«Navoiyazot» huzurida 1 mlrd dollarlik yangi kimyo loyihalari amalga oshiriladi

Navoiy viloyatida kimyo sanoatida yuqori qo‘shilgan qiymatga ega mahsulotlar ishlab chiqarishni kengaytirish maqsadida 1 milliard dollarlik 10 ta yangi kam tonnali kimyo loyihasi amalga oshiriladi. Bu haqda prezident Shavkat Mirziyoyev raisligida o‘tkazilayotgan kimyo sanoatini rivojlantirishga bag‘ishlangan yig‘ilishda ma’lum qilindi.

Yig‘ilishda qayd etilganidek, so‘nggi yillarda kimyo sohasiga 8,3 milliard dollar investitsiya jalb qilinib, 87 ta yirik ishlab chiqarish quvvati ishga tushirildi. Natijada PVX, “yashil” vodorod, ko‘pikli polipropilen va BOPP plyonka kabi 60 dan ortiq yangi turdagi mahsulotlar ishlab chiqarish o‘zlashtirildi.

Shu bilan birga, kimyo sanoatida hal qilinishi lozim bo‘lgan masalalar ham saqlanib qolmoqda. Xususan, tarmoq o‘sish sur’atlari respublika sanoati o‘rtacha ko‘rsatkichlaridan past ekani, kimyo mahsulotlari importi esa yiliga 4,5 milliard dollarga yetgani ta’kidlandi.

Prezident yuqori qo‘shilgan qiymatli mahsulotlar ishlab chiqarishga alohida e’tibor qaratdi. Masalan, “Navoiyazot”da ishlab chiqarilayotgan bir tonna sian tuzining bozor qiymati 3,7 ming dollar bo‘lsa, uni qayta ishlab yelim mahsuloti tayyorlanganda qiymati 8 ming dollargacha oshishi mumkinligi qayd etildi.

Shu munosabat bilan mutasaddilarga “Navoiyazot” huzuridagi kimyo klasterida umumiy qiymati 1 milliard dollar bo‘lgan 10 ta kam tonnali kimyo loyihasini boshlash topshirildi.

Yig‘ilishda kimyo sanoatida mahalliy xomashyoni chuqur qayta ishlash, import o‘rnini bosish va eksportbop mahsulotlar ishlab chiqarishni ko‘paytirish sohaning asosiy vazifalaridan biri ekani ta’kidlandi.