«Raqamimni aynan Ronaldu uchun berdim». Jaloliddin Masharipov Krishtianuni «An-Nasr»da kutishayotganini tasdiqladi

OAVlarda Saudiya Arabistonining «An-Nasr» klubi Krishtianu Ronalduga taklif bilan chiqqani, portugaliyalik yulduzga 2,5 yillik shartnoma va 200 million yevro maosh taklif qilingani haqida xabarlar ko‘paydi.

Turli manbalar ovoza qilgan bu xabarga keyinchalik Ronalduning o‘zi munosabat bildirdi va «An-Nasr»ga o‘tishim haqidagi gap-so‘zlarni qayerdan olyapsizlar, bilmayman. Men u klubga o‘tmayman», qabilida gapirdi.

Bugun esa O‘zbekistondagi sportga ixtisoslashgan internet OAVlari «An-Nasr»da to‘p tepayotgan hamyurtimiz Jaloliddin Masharipov o‘zining 7-raqamini 77-raqamga almashtirgani haqida yozdilar. Bu go‘yo Jaloliddin va «An-Nasr» Krishtianuning kelishiga tayyorgarlik ko‘rayotgandek taqdim etilmoqda. Masalaga oydinlik kiritish maqsadida Tribuna.uz muxbiri Jaloliddin Masharipov bilan bog‘landi.

«Klub Ronalduga taklif bilan chiqqani rost. Taklif qilingan pullar miqdori va shartnoma muddati ham bor gap. Menga klub rahbariyati murojaat qildi: «Jaloliddin, raqamingni olsak, xafa bo‘lmaysanmi? Biz Ronalduga taklif yubordik, u taklifni qabul qilsa va jamoaga kelishni ixtiyor etsa, biz unga bu raqamni bo‘shatib qo‘ymoqchimiz», deyishdi. Men esa bunda muammo yo‘q, menga 77-raqamni beringlar, dedim. Agar Ronaldu klub taklifini qabul qilmasa, keyingi mavsumdan 7-raqamda yana o‘zim o‘ynayveraman», - dedi O‘zbekiston milliy jamoasining hujumkor yarimhimoyachisi.

Shuningdek, Masharipov Krishtianu Ronalduning jamoaga kelishini o‘zi ham istayotganini aytib o‘tdi: «Bordi-yu u jamoaga kelsa, bundan faqat xursand bo‘laman, chunki bu nafaqat klub va Saudiya futboli, balki men uchun ham katta voqelik bo‘ladi. Bunday kalibrdagi futbolchi bilan birga to‘p tepish hammaga ham nasib qilavermaydi. Ochig‘i, uning kelishini o‘zim ham kutyapman. Birga o‘ynash nasib qilsa, undan o‘rganadigan narsalarim ko‘p. Bu rivojlanishimga ham yordam beradi. Uning «Nasr»ga kelishi shaxsan mening kareramdagi yana bir yangi sahifa bo‘ladi», - dedi Jaloliddin Masharipov Tribuna.uz muxbiriga.

Eslatib o‘tamiz, 37 yoshli portugaliyalik noyabrda «Manchester Yunayted»ni tark etgach, haligacha erkin agent sanaladi.

Avvalroq, futbolchi Chempionlar ligasida ishtirok etayotgan klubda to‘p surish istagini bildirayotgan bo‘lsa-da, uning oldida «An-Nasr»dan boshqa taklif yo‘qligi haqida ma’lum qilingandi.