ITFC Ipak Yo‘li banki bilan qiymati 15 million AQSh dollariga teng moliyalashtirishga oid shartnomani imzoladi

2022 yil 13 dekabr kuni Saudiya Arabistonining Jidda shahrida Xalqaro islom savdo-moliya korporatsiyasi (ITFC) va "Ipak Yo‘li" AITB o‘rtasida O‘zbekiston xususiy sektorida savdoni moliyalashtirish bo‘yicha ko‘maklashish, shuningdek, kichik va o‘rta biznesni rivojlantirish bo‘yicha shartnoma imzolandi.

Moliyaviy institutlar orasida ilk marotaba amalga oshirilayotgan mazkur shartnoma O‘zbekiston Respublikasi hukumati va ITFC o‘rtasidagi qiymati 500 mln AQSh dollariga teng doiraviy bitim asosida amalga oshirilgan bo‘lib, shundan qiymati 15 mln AQSh dollariga teng mablag‘larni shariat tamoyillariga muvofiq Bank xususiy sektordagi mijozlarining o‘sib borayotgan talabini qondirish uchun savdoni moliyalashtirishga yo‘naltiradi.

"Ipak Yo‘li Banki bilan tuzilgan mazkur shartnoma O‘zbekiston xususiy sektorida shariatga muvofiq savdoni moliyalashtirishdan foydalanishni osonlashtirishga yo‘naltirilgan harakatlarimizni qo‘llab-quvvatlaydi. Biz a’zo mamlakatlarimiz va asosiy hamkorlarimiz savdoni kengaytirish orqali iqtisodiy o‘sishga intilayotganda ularning savdoni rivojlantirish muammolarini hal qilish uchun mo‘ljallangan kompleks savdo yechimlarini taklif qilishga sodiq qolamiz", - deya ta’kidlab o‘tdi ITFC direktori, janob Xani Salem Sonbol.

O‘z navbatida, Ipak Yo‘li Banki boshqaruvi raisi Saidabror Saydahmedov quyidagilarni ta’kidladi: "Biz ITFC bilan o‘zaro manfaatli hamkorligimizni yo‘lga qo‘ygan ilk shartnomamizni imzolashdan mamnunmiz. Mablag‘lar O‘zbekistondagi mikro, kichik va o‘rta biznes korxonalarini moliyalashtirishga yo‘naltiriladi, bu esa mamlakatdagi bunday kichik va o‘rta biznes sub’yektlar o‘rtasida islomiy moliyaviy xizmatlardan xabardorlik darajasining ortishiga xizmat qilib keladi".

Xalqaro savdo moliyalashtirish korporatsiyasi to‘g‘risida ma’lumot (ITFC)

 Xalqaro islom savdo-moliya korporatsiyasi (ITFC) Islom taraqqiyot banki (IsDB) guruhining a’zosi hisoblanadi. Korporatsiya Islom Hamkorlik Tashkilotiga (IHT) a’zo mamlakatlar o‘rtasida savdoni rivojlantirish maqsadida tashkil etilgan bo‘lib, bu pirovarida butun dunyodagi xalqlarning ijtimoiy-iqtisodiy sharoitlarini yaxshilash maqsadiga xizmat qiladi. O‘z faoliyatini 2008 yil yanvar oyidan boshlagan ITFC IHTga a’zo mamlakatlarga 66 mlrd AQSh dollari miqdorida moliyaviy ko‘mak ajratdi va bu uni mazkur a’zo mamlakatlar ehtiyojlari uchun savdo yechimlari bo‘yicha yetakchi yetkazib beruvchiga aylantirdi. IHTga a’zo mamlakatlarda va undan tashqarida savdoni rivojlantirish uchun katalizator bo‘lishni maqsad qilgan korporatsiya a’zo mamlakatlardagi tadbirkorlik korxonalariga savdoni moliyalashtirishda ko‘maklashadi va ularga savdo bilan bog‘liq salohiyatni oshirish uchun zarur vositalarni taqdim etib, jahon bozorida muvaffaqiyatli raqobatga kirishishda yordam beradi.

 Reklama