YeI: Rossiyaning Dniproga raketa hujumi urush jinoyatidir

Rossiya Ukrainadagi odamlarning omon qolishi uchun zarur bo‘lgan muhim infratuzilmaga hujum qilishga qaror qilganidan so‘ng, mojaroni yanada kuchaytirdi. Bu haqda 16 yanvar, dushanba kuni Yevropa komissiyasi matbuot kotibi Peter Stano ma’lum qildi. «Endi gap tinch aholining uylariga ko‘payib borayotgan hujumlar haqida ketmoqda», dedi Stano DW muxbirining 14 yanvar kuni Dniproga 40 nafar tinch aholining hayotiga zomin bo‘lgan raketa hujumi haqidagi savoliga javoban.

«Rossiya o‘zining g‘ayriinsoniy qiyofasini ko‘rsatishda davom etmoqda va shafqatsiz raketa terrorini qo‘llamoqda. Bunday harakatlar urush jinoyatlarini tashkil etadi va zudlik bilan to‘xtatilishi kerak. Yevropa Ittifoqi bosh diplomati Jozep Borrel aytganidek, ular jazosiz qolmaydi», - deya ta’kidladi Yevrokomissiya vakili.

U Yevropa Ittifoqi pozitsiyasi har doim mojarolarning har qanday kuchayishiga javob berishdan iborat bo‘lganini tushuntirdi va Bryusselning Kreml tomonidan vaziyat keskinlashtirilishining yangi belgilariga munosabati haqidagi muhokamalar hozirda davom etayotganini aytdi. Xususan, bu mavzu 22 yanvar kuni Yevropa Ittifoqi mamlakatlari tashqi ishlar vazirlari kengashida muhokama qilinadi.