Ispaniyaning “Maksam” kompaniyasi O‘zbekiston tomoni bilan nizoni hal qilish uchun Londondagi xalqaro arbitrajga da’vo arizasi bilan murojaat qilgan.
“Eurasianet” xabariga ko‘ra, kelishmovchilik “Maksam” kompaniyasi va “O‘zkimyosanoat” davlat kompaniyasi 49/51 nisbatda egalik qiladigan “Maksam-Chirchiq” kimyo korxonasiga oid.
Qayd etilishicha, “Maksam” O‘zbekiston hukumatini o‘rtadagi shartnoma shartlarini doimiy ravishda buzish ayblovlari ortidan yetkazilgan zararni undirish uchun da’vo qilayotgan bo‘lishi mumkin. “Maksam” kompaniyasining matbuot kotibi gap aynan nima haqida ketayotganini nashrga ochiqlamagan.
“Maksam” O‘zbekiston hukumati bilan muzokaralar orqali murosaga kelishdan umidvor edi, chunki mamlakatga kattagina sarmoya kiritgandi. Lekin vaziyat shunday darajaga keldiki, ular muammolarini muloqot va muzokaralar yo‘li bilan hal qila olmadi. Xalqaro arbitraj sudiga da’vo arizasini berish ularning oxirgi chorasidir”, – degan nizoli holatdan xabardor manba.
Kun.uz holat yuzasidan izoh olish maqsadida “O‘zkimyosanoat” AJ matbuot kotibi Rustambek Eshbekovga bog‘landi. U kompaniya mazkur vaziyatdan xabardorligini va bu masala yuzasidan aniq, asoslangan ma’lumotlar tayyorlanayotganini ma’lum qildi.
“Bu yuridik jihatdan aniq asoslanishi lozim bo‘lgan xalqaro darajadagi masala. Shuning uchun biroz vaqt talab qiladi”, – dedi “O‘zkimyosanoat” rasmiy vakili.
“Maksam-Chirchiq” haqida
2007 yilda Chirchiq azotli o‘g‘itlar zavodining 49 foiz ulushi Ispaniyaning “Maksam” kompaniyasiga o‘tgan. Shundan keyin “O‘zkimyosanoat” va “Maksam”ga tegishli “Maksam-Chirchiq” aksiyadorlik jamiyati tashkil etilgan.
Hozirda “Maksam Chirchiq” AJning 51 foiz ulushi “O‘zkimyosanoat” AJ davlat kompaniyasi, 49 foizi esa Ispaniyaning “Maxamcorp International S.L” kompaniyasiga qarashli.
“Maksam-Chirchiq” AJ – 40 dan ortiq turdagi mahsulotlar ishlab chiqaruvchi O‘zbekiston kimyo sanoatidagi yirik korxonalardan biridir. U “A” markali karbamid ishlab chiqarish bo‘yicha mamlakatdagi tabiiy monopolist
