Ma’lum qilinishicha, irrigatsiya va melioratsiya tadbirlari natijasida so‘nggi besh yilda 826,5 ming gektar yer qishloq xo‘jaligi foydalanishiga kiritilgan. Shuning 409 ming gektari sug‘oriladigan yerlar, 418 ming gektari esa lalmi va yaylov yerlarni o‘zlashtirish hisobiga to‘g‘ri keladi.
Taqdimotda 2030 yilgacha yana 938 ming gektar yaylovlarni o‘zlashtirish va holatini yaxshilash rejalari bildirildi. Xususan, 2026–2027 yillarda 620 ming gektar yaylov tiklanib, uning 300 ming gektarida yaylov o‘simliklari ekilishi, 130 ming gektarida quduqlar o‘rnatilishi rejalashtirilgan. Bu orqali qariyb 960 ming bosh mayda shoxli mol boqish imkoniyati yaratiladi.
Prezident yangi yerlarni o‘zlashtirishda har bir hudud bo‘yicha aniq investor va loyiha asosida ish tashkil qilish muhimligini ta’kidladi. Shuningdek, agrar sohada ilm-fanni yangi bosqichga olib chiqish, kadrlar tayyorlash tizimini takomillashtirish va yuqori samaradorlikka erishish bo‘yicha tegishli vazifalar belgilab berildi.
