O‘n minglab rossiyaliklar elektron chaqiruv qog‘oziga qarshi petitsiyani imzoladi

Samaralik jurnalist Sergey Podsitnik 12 aprel, chorshanba kuni Change.org veb-saytida Davlat dumasi va Federatsiya kengashi tomonidan bir kun avval qabul qilingan, armiyaga elektron chaqiruv qog‘ozlarini joriy etishni nazarda tutuvchi tuzatishlarni bekor qilishga chaqiruvchi petitsiya joylashtirdi.

«Ushbu o‘zgartirishlar bizning huquqlarimizni buzadi. Fuqaro o‘z huquqlaridan sud qarorisiz mahrum etilishi mumkin emas. Endi bu huquq harbiy komissarlarga berildi», - deyiladi murojaatnomada. Podsitnik e’tiborni rossiyaliklarga chaqiruv qog‘ozlarini topshirish rejalashtirilgan «Gosuslugi» xizmatida bir qator zaifliklar mavjudligiga qaratdi, bundan tashqari, mamlakatning barcha aholisi ham ushbu xizmatdagi akkauntlariga kirish imkoniga ega emas, 30 yoshdan oshgan ruslarning deyarli 30 foizi faol internet foydalanuvchilari hisoblanmaydi.

Qabul qilingan o‘zgartirishlarga ko‘ra, agar chaqiriluvchi qog‘oz ko‘rinishidagi chaqiruv qog‘ozini olmagan bo‘lsa va «Gosuslugi»dagi o‘z akkauntiga kirmagan bo‘lsa ham, chaqiruv qog‘ozi chaqiruv qog‘ozlari ro‘yxatida paydo bo‘lgan kundan boshlab yetti kun o‘tgach topshirilgan deb hisoblanadi. Shunda fuqaroga mamlakatdan chiqish taqiqlanadi. 20 kundan keyin esa yangi taqiqlar joriy etiladi – harbiy komissarlikka kelmaganlar yakka tartibdagi tadbirkor bo‘lish, ko‘chmas mulkni boshqarish, avtomobil haydash va kredit olish imkoniyatidan mahrum etiladi.

Rossiya Mudofaa vazirligi 18 yoshga to‘lgan maktab bitiruvchilari bilan shartnomalar tuzishi mumkin bo‘ladi. Elektron chaqiruv qog‘ozlarini joriy etish bilan birga, Davlat dumasi 11 aprel kuni buning uchun mavjud bo‘lgan cheklovlarni olib tashladi. Deputatlar «Harbiy majburiyat va harbiy xizmat to‘g‘risida»gi qonunning harbiy shartnoma tuzish qoidalarini belgilab beruvchi 34-moddasiga kiritilgan o‘zgartirishlarni ma’qulladi. Hujjat Davlat dumasi saytida e’lon qilingan.

Ushbu moddaning oldingi tahririga ko‘ra, armiya, Milliy gvardiya, Tashqi razvedka xizmati, Favqulodda vaziyatlar vazirligi, «FSB» va davlat qo‘riqlash organlarida xizmat qilish uchun shartnomani muddatli harbiy xizmatni o‘tmagan 18 yoshdan oshgan, o‘rta maxsus ta’lim muassasasini tamomlagan shaxs ham tuzishi mumkin edi. Endilikda «o‘rta maxsus ta’lim olgan» fuqarolar haqidagi ibora qonundan olib tashlandi.

Davlat dumasi Mudofaa qo‘mitasi rahbari Andrey Kartapolov o‘tgan yozda shunday tuzatishni qabul qilishni taklif etgandi. Biroq, e’lon qilinganidan so‘ng, u ko‘rib chiqilmadi va 2022 yil oktabr oyida kuchga kirgan qonun versiyasida yo‘q edi. Bu safar, BBC ta’kidlashicha, texnikumni tugatmagan 18 yoshli o‘smirlar bilan harbiy shartnomalar tuzish to‘g‘risidagi tuzatish deyarli bir ovozdan ma’qullandi.