Oʻzbekiston Qurolli Kuchlarida harbiy xizmatchilarning kitobxonlik madaniyatini rivojlantirish boʻyicha qoʻshimcha chora-tadbirlar toʻgʻrisidagi Vazirlar Mahkamasi qarori loyihasi ishlab chiqildi.
Hujjatdan koʻzlangan maqsad harbiy xizmatchilarning kitobxonlik madaniyatini rivojlantirish, maʼnaviy-axloqiy fazilatlari, intellektual salohiyati va dunyoqarashini yuksaltirish, shuningdek milliy va jahon adabiyotining sara namunalarini keng targʻib qilishdan iborat.
Loyiha bilan Respublika Maʼnaviyat va maʼrifat markazi, Yozuvchilar uyushmasi, Fanlar akademiyasi Tarix instituti hamda Yoshlar ishlari agentligining Qurolli Kuchlar tarkibidagi harbiy qism va muassasalar kutubxonalarini 1 million nusxadagi badiiy adabiyotlar bilan taʼminlash toʻgʻrisidagi taklifiga rozilik berish nazarda tutilgan.
Loyihaga koʻra, Mudofaa vazirligi, Ichki ishlar vazirligi, Favqulodda vaziyatlar vazirligi, Davlat xavfsizlik xizmati va Milliy gvardiya 1 million nusxadagi adabiyotlarni xarid qilish boʻyicha buyurtmachilar etib belgilanadi.
Kitoblarni Qurolli Kuchlar tarkibiga kiruvchi vazirlik va idoralar oʻrtasida alohida taqsimot asosida ajratish koʻzda tutilgan.
Masʼul vazirlik va idoralarga bir oy muddatda harbiy qism va muassasalar kutubxonalari uchun xarid qilinadigan kitoblar roʻyxatini tasdiqlash vazifasi yuklanishi mumkin.
Roʻyxatga harbiy xizmatchilar oʻrtasida vatanparvarlik, fidoyilik va mehnatsevarlik kabi fazilatlarni targʻib etuvchi badiiy, tarixiy, harbiy-vatanparvarlik, ilmiy-ommabop va sohaga oid adabiyotlar kiritilishi nazarda tutilgan.
Loyihada muddatli harbiy xizmatchilar tomonidan oʻqib-oʻrganilishi lozim boʻlgan qator asarlar ham alohida koʻrsatilgan.
Jumladan:
- «Alpomish» dostoni;
- Zahiriddin Muhammad Boburning «Boburnoma» asari;
- Abdulla Qodiriyning «Oʻtgan kunlar» romani;
- Abdulhamid Choʻlponning «Goʻzal Turkiston» va «Xalq dengizdir» asarlari;
- Erkin Vohidovning «Oʻzbegim» va «Inson» qasidalari;
- Abdulla Oripovning «Oʻzbekiston» sheʼri;
- Muhammad Yusufning «Hech kimga bermaymiz seni, Oʻzbekiston» sheʼri.
