Pentagon maxfiy ma’lumoti: 2023 yilda Kiyev va Moskva o‘rtasida muzokara o‘tkazilmaydi

AQSh razvedkasiga ko‘ra, Rossiya va Ukraina o‘rtasida 2023 yilda tinchlik muzokaralari bo‘lishi dargumon. 

The Washington Post gazetasi yaqinda Pentagondan sizib chiqqanidan so‘ng ijtimoiy tarmoqlarga tarqalib ketgan maxfiy hujjatdan parchalarni chop etdi. 

Haqiqiyligi tasdiqlanmagan hujjatga ko‘ra, Ukraina o‘z hududining katta qismini ozod qilishi va Rossiya armiyasining jiddiy yo‘qotishlari tinchlik muzokaralariga olib kelishi dargumon. 

AQSh maxsus xizmatlari fikricha, voqealar rivojining «eng ehtimoliy ssenariysi» shundan iboratki, 2023 yil oxirigacha Rossiya va Ukraina «mayda» hududiy muvaffaqiyatga erisha oladi va hech bir tomon hal qiluvchi ustunlikni qo‘lga kiritmaydi. 

Ukrainada urush ichki umidsizlikka va rahbariyat «tanqid qilinishiga» olib keladi, bu esa «uni almashtirish ehtimolini oshiradi». 

Hujjatda aytilishicha, urushning davom etishi Rossiyani «tugayotgan zaxiralar»dan foydalanishga majbur qiladi, shuningdek, annexia qilingan hududlarning integratsiyalashuvini «tezlashtirishga» undaydi. 

Amerika razvedkasi urushning borishiga ta’sir qilishi mumkin bo‘lgan 4 ta kutilmagan ssenariyni ko‘rib chiqmoqda. Bu haqda 12 aprel kuni The New York Times gazetasi Pentagonning sizib chiqqan maxfiy hujjatlaridan biriga tayangan holda ma’lumot berdi.

Birinchi ssenariy - Vladimir Putinning o‘limi, ikkinchisi - Ukraina prezidenti Volodimir Zelenskiyning o‘limi. Uchinchi ssenariy – Rossiya armiyasi rahbariyatining o‘zgarishi, to‘rtinchisi esa «Ukrainaning Kremlga zarba berishi» ehtimolini o‘z ichiga oladi.

Hujjatda aytilishicha, bu ssenariylar urushning borishiga sezilarli ta’sir ko‘rsatishi yoki bunday bo‘lmasligi ham mumkin. Bundan tashqari, ular urushni tugatadigan tinchlik muzokaralariga ham, keskinlashuvga ham olib kelishi mumkin.

Nashrning yozishicha, Vashington eng ko‘p «Ukrainaning Kremlga zarbasi» ssenariysidan xavotirda (hujjatda uning batafsil tavsifi yo‘q), chunki bu Rossiya tomonidan keskin eskalatsiyaga, jumladan, taktik yadro qurolidan foydalanishga olib kelishi mumkin. Biroq, bu zarba, razvedka ma’lumotlariga ko‘ra, Putinni muzokaralar zarurligiga ham undashi mumkin.