Yevropa Ittifoqi diplomatiyasi rahbari Jozep Borrel Xartumdagi Aydan O'Xara qarorgohiga uyushtirilgan hujumni Vena konvensiyasini qo‘pol ravishda buzish deb atadi.
Sudanda Yevropa Ittifoqining ushbu Afrika davlatidagi vakili, irlandiyalik diplomat Aydan O'Xara Xartumdagi o‘z qarorgohida hujumga uchradi. Bu haqda 17 aprel, dushanba kuni Yevropa Ittifoqining tashqi ishlar va xavfsizlik siyosati bo‘yicha oliy vakili Jozep Borrel Twitter'da ma’lum qildi.
Borrelga ko‘ra, sodir bo‘lgan voqea Vena konvensiyasini qo‘pol ravishda buzish hisoblanadi. «Diplomatik binolar va xodimlar xavfsizligi Sudan hukumatining asosiy mas’uliyati va xalqaro huquq bo‘yicha majburiyatidir», dedi Yevropa Ittifoqining tashqi ishlar bo‘yicha Oliy vakili.
Jozep Borrel YeI vakilining Sudandagi qarorgohiga qilingan hujumga oid qo‘shimcha ma’lumot bermadi. Germaniyaning dpa agentligi diplomatik doiralardagi manbalariga tayanib xabar berishicha, O'Xara jarohat olmagan va hozirda o‘zini yaxshi his qilmoqda.
Avvalroq, 17 aprel kuni Borrel Sudanda davom etayotgan to‘qnashuvlar fonida YeI mojaroning har ikki tomonini humanitar pauza va muloqot zarurligiga ishontirishga harakat qilayotganini aytdi. «Sudandagi tinch aholi xavfsiz bo‘lishi va vositachilik qilish uchun joy olishi kerakligi tufayli zudlik bilan o‘t ochishni to‘xtatish lozim», dedi u.
Sudanda armiya va isyonchilar o‘rtasidagi to‘qnashuvlar og‘ir artilleriya, tanklar va havo hujumlari bilan kechishi oqibatida qurbonlar soni ortib bormoqda. Janglar chog‘ida 97 kishi halok bo‘ldi, yana 942 kishi yaralandi, deb xabar berdi 17 aprel kuni mahalliy shifokorlar uyushmasi.
Jahon sog‘liqni saqlash tashkiloti (JSST) ma’lumotlariga ko‘ra, qurbonlar soni kamida 83 kishini tashkil etgan, 1000 dan ortiq kishi jarohat olgan. Poytaxt Xartumning aholi zich joylashgan hududlarida qurbonlarning haqiqiy soni bundan ham ko‘p, degan xavotirlar bor.
Sudan armiyasi va Tezkor harakat kuchlari (RSF) o‘rtasida janglar davom etyapti. Janglar Xartumda va hukumat inshootlari, jumladan, prezident saroyi va qurolli kuchlar bosh qarorgohida yuz beryapti. To‘qnashuvlar yana bir qator boshqa shaharlarda, jumladan Janubiy Darfur provinsiyasi markazi bo‘lgan, aholi zich joylashgan Nyala shahrida ham sodir bo‘lmoqda.
So‘nggi kunlarda Sudanning amalda prezidenti bo‘lgan Abdul Fattoh al-Burhon va uning o‘rinbosari, RSF’ni boshqarayotgan Muhammad Hamdan Dagalo o‘rtasidagi ziddiyat keskin avj oldi. Isyonchilar mamlakatning kamida uchta aeroportini, shuningdek, bir qator harbiy obektlar va prezident saroyini egallab olganini ma’lum qildi. Sudan armiyasi bu ma’lumotni rad etdi. Mamlakat harbiy-havo kuchlari RSF bazalariga havo hujumlarini davom ettirib, tinch aholini uyda qolishga chaqirdi.
