09:12 / 20.04.2023
4021

YeI parlamenti - Moldovaning 2023 yilda a’zoligi bo‘yicha muzokaralar tarafdori

Yevroparlament Moldova bo‘yicha rezolyutsiyani qabul qilib, Bryusselni 2023 yil oxirigacha mamlakatning YeIga kirishi bo‘yicha muzokaralarni boshlashga, shuningdek, qochoq Moldova oligarxlariga qarshi sanksiyalar joriy etishga chaqirdi.

Foto: AP

19 aprel, chorshanba kuni Yevropa Ittifoqi parlamenti Moldova bo‘yicha rezolyutsiyani qabul qildi va unda Bryusselni Kishinyov bilan 2023 yil oxirigacha YeIga qo‘shilish bo‘yicha muzokaralarni boshlashga chaqirdi. Buning sharti sifatida Moldova Yevropa Komissiyasi tomonidan belgilangan to‘qqiz qadamni bajarishi kerak. Yevroparlament deputatlariga ko‘ra, Moldovaning Yevropa Ittifoqiga a’zoligi birlashgan va kuchli Yevropaga geostrategik sarmoya bo‘ladi.

Shu bilan birga, parlament Moldova hukumatini demokratiya va qonun ustuvorligi sohasidagi islohotlarni davom ettirishga, Yevropa Ittifoqi va keng qamrovli erkin savdo hududi to‘g‘risidagi bitimni to‘liq amalga oshirishga erishishga hamda xalqaro uyushgan jinoyatchilikka qarshi kurashishga chaqirdi.

Rezolyutsiyada deputatlar YeIni moldovalik qochqin oligarxlar Ilan Shor va Vladimir Plaxotnyukka, ularning kompaniyalari va siyosiy tashkilotlariga qarshi zudlik bilan sanksiyalar qo‘llashga hamda ular sudda javob berishi uchun Moldovaga ekstraditsiya qilishga chaqiradi.

Parlament, shuningdek, Yevropa Ittifoqidan Moldovadagi xavfsizlik, barqarorlik, konstitutsiyaviy va demokratik asoslarga putur yetkazuvchi korrupsiya xatti-harakatlari uchun sanksiyalar ko‘lamini kengaytirishni so‘radi.

Mamlakat Rossiya tomonidan bosim ostida va yevropaparast hukumatni beqarorlashtirishga urinishlar, shuningdek, Ukrainadagi urush tufayli iqtisodiy o‘zgarishlar yuz bermoqda, deya qayd etadi Yevroparlament. U Moldova prezidenti Mayya Sandu rahbariyati va mamlakat rasmiylarini ushbu muammolarni hal qilish yo‘lidagi ishlarini olqishladi.

Mavzuga oid
Top