DW xabariga koʻra, Moldova Mudofaa vazirligi dron mahalliy vaqt bilan soat 16:22 da mamlakat havo hududiga noqonuniy kirganini bildirgan. Soat 17:06 da esa apparat qulab, portlagani haqida xabar berilgan. Politsiya uning parchasi suratini eʼlon qilgan.
Bundan oldin, 16-oktabrga oʻtar kechasi yana toʻrtta dronning mamlakat havo hududidan oʻtgani qayd etilgan.
Moldova TIV bunday hodisalar fuqarolar xavfsizligiga tahdid solishini taʼkidlagan. Vazirlik Rossiyani Ukrainaga hujumlarni zudlik bilan toʻxtatishga, xalqaro huquq meyorlari, jumladan, Moldovaning suvereniteti va hududiy yaxlitligini hurmat qilishga chaqirgan.
Mudofaa vazirligi maʼlumotiga koʻra, soʻnggi dronning qulashi bilan 10-oktabrdan buyon havo hududi buzilishi holatlari sakkiztaga yetgan. Ular orasida 10-oktabr kuni Geamana aholi punktiga portlovchi modda ortilgan dron tushishi ham bor.
Harbiy idora 2026-yil boshidan mamlakat havo hududi buzilgan 64 ta holat qayd etilganini bildirgan. Shulardan 16 tasi oktabr oyiga toʻgʻri keladi. Rossiyaning Ukrainaga keng koʻlamli bosqini boshlangan 2022-yildan buyon esa bunday hodisalar soni 101 taga yetgan.
Avvalroq, 3-oktabr kuni Moldova hududiga uchta raketa va ikkita dron tushgani xabar qilingan edi. Oʻsha hodisalarda halok boʻlganlar va jarohatlanganlar boʻlmagan.
