YeI Gurjistonni Rossiyadan “ishonchsiz samolyotlar”ni kiritmaslikka chaqirdi

Yevropa Ittifoqi Gurjistonni Rossiya samolyotlarining texnik ishonchsizligi sababli o‘z hududiga kirishiga yo‘l qo‘ymaslikka, shuningdek, aviatsiya sohasida YeI sanksiyalariga qo‘shilishga chaqirdi.

Bryussel 11 may, payshanba kuni Tbilisini “ishonchsiz Rossiya samolyotlarini” o‘z hududiga kiritmaslikka chaqirdi. Yevropa Ittifoqining tashqi siyosat bo‘yicha vakili Piter Stano so‘zlariga ko‘ra, G‘arb sanksiyalari tufayli Rossiya xalqaro xavfsizlik standartlariga rioya qilish uchun zarur bo‘lgan samolyot parkining 95 foizini yangilay yoki modernizatsiya qila olmayapti.

Yevropa Ittifoqi a’zo bo‘lishga intilayotgan davlat sifatida Gurjistonni Rossiyaga, jumladan, aviatsiya sohasida joriy qilingan sanksiyalarga qo‘shilishga va ularni chetlab o‘tishga urinishlarni kuzatishga chaqiradi. Yevropa Ittifoqi Ukrainaga bostirib kirishi uchun jazo choralari doirasida Rossiyaga, Rossiyadan yoki Rossiya uzra parvozlarni amalga oshirishga ruxsat bermaydi.

Rossiya Federatsiyasiga kirish vizalarining bekor qilinishi bo‘yicha, faqat Gurjiston fuqarolari ushbu taklifdan foydalanish yoki foydalanmaslikni hal qilish huquqiga ega, dedi Stano.

Bir kun avval Rossiya prezidenti Vladimir Putin 15 maydan Gurjiston fuqarolari uchun viza rejimini bekor qilish va 2019 yildan beri amalda bo‘lgan Rossiya Federatsiyasidan Gurjistonga havo qatnoviga qo‘yilgan taqiqni bekor qilish to‘g‘risidagi farmonlarni imzoladi. Gurjiston fuqarolari, ushbu farmonga ko‘ra, Rossiyaga faqat pasportini ko‘rsatish orqali kirishlari mumkin bo‘ladi - agar ular mamlakatda 90 kundan kam bo‘lmoqchi bo‘lsa va o‘qish yoki ishlash niyatida bo‘lmasa.

Bu ma’lumotga Gurjiston prezidenti Salome Zurabishvili Twitter’da izoh berdi. "Rossiyaning navbatdagi provokatsiyasi! Rossiya Ukrainaga qarshi tajovuzni davom ettirib, bizning hududimizni egallab olish davom etar ekan, Gurjiston bilan to‘g‘ridan to‘g‘ri reyslarning tiklanishi va viza rejimi bekor qilinishini qabul qilib bo‘lmaydi", deb yozgan u.