Sinoptiklar iyul oyida ob-havo qanday bo‘lishi to‘g‘risida ma’lumot berdi

Iyul - yozning eng qizg‘in davri va aynan iyul oyida mamlakatda eng yuqori havo haroratlari kuzatiladi. "O‘zgidromet" xabariga ko‘ra, iyul oyi juda issiq bo‘lmasligi kutilmoqda.

Foto: Kun.uz

Hududning katta qismida o‘rtacha oylik harorat o‘rtacha ko‘p yillik qiymatlarga yaqin bo‘lishi kutilmoqda va faqat shimolda, janubda va cho‘l hududlarda ba’zi joylarda me’yordan +1...+1,5 darajaga yuqori bo‘ladi.

O‘zbekiston hududida Eron hududlaridan yana issiq havo kirib kelishi hisobiga iyul oyi issiq ob-havo bilan boshlanadi. 1-3 iyul kunlari havo haroratining qiymatlari +37...+40 darajaga, cho‘l hududlarda va respublika janubida +41...+43 darajaga yetadi.

Iyul oyi birinchi o‘n kunligi o‘rtalariga borib, harorat 3-5 darajaga pasayishi kutilmoqda.

Keyinchalik, oy oxirigacha havo harorati kechalari +20...+25 daraja atrofida, ba’zi joylarda +27 darajacha, kunduz kunlari +33...+38 darajagacha, ayrim kunlarda +39...+41 darajagacha, janubda va cho‘l hududlarda +42...+45 darajagacha bo‘ladi.

Respublika bo‘yicha ba’zi joylarda, asosan tog‘oldi va tog‘li hududlarda ayrim kunlarda mahalliy qisqa muddatli yomg‘ir yog‘ishi va momaqaldiroq bo‘lishi mumkin.

Tayyorlagan: Отабек Матназаров

#ob-havo #O‘zgidromet