Suriyada «vagnerchilar» isyon paytida RF Mudofaa vazirligi bilan shartnoma imzolashga majburlangan

Rossiyada «Vagner» XHK va Yevgeniy Prigojin tomonidan isyonga urinish paytida Suriya hukumati isyon tarqalishining oldini olish uchun ushbu Yaqin Sharqdagi «Vagner» XHK vakillarini zararsizlantirishga qaratilgan bir qator choralarni ko‘rdi. Bu haqda 7 iyul, juma kuni vaziyatdan xabardor manbalarga tayangan holda Reuters agentligi xabar bermoqda. 

«Vagner guruhi» yollanma askarlari joylashgan joyda Suriya harbiy razvedkasi ularning bir-biri bilan yoki Rossiyadagi XHK vakillari bilan aloqa qilishiga yo‘l qo‘ymaslik uchun telefon va internetni o‘chirib qo‘ydi. O‘nga yaqin «Vagner» qo‘mondoni Rossiyaning Xmeymim harbiy bazasiga olib kelingan va u yerda ularga tanlov qo‘yilgan: Mudofaa vazirligi bilan shartnoma imzolash yoki zudlik bilan mamlakatni tark etish. Reuters manbalariga ko‘ra, isyondan keyingi kunlarda shartnoma imzolashdan bosh tortgan o‘nlab odamlar Rossiyaga olib ketilgan. Yollanma askarlarning maoshlari ham qisqartirilgan. 

Istanbuldagi mustaqil tahlil markazi - Omran strategik tadqiqotlar markazi xodimi Navar Shaban shunday dedi: «Vagner» XHKning Suriyadagi roli keskin pasayib ketdi». «Barcha voqealarni inobatga olgan holda, hozirda ularning Suriya Mudofaa vazirligi bilan aloqasi uzilgan», — deya qo‘shimcha qildi u. 

«Vagner» XHK yollanma askarlarining nisbatan kichik guruhi Suriyada bo‘lgan - taxminiy hisob-kitoblarga ko‘ra, 250 dan 450 kishigacha, bu mamlakatdagi Rossiya harbiylari umumiy sonining taxminan o‘n foizini tashkil qiladi. Kuzatuvchilarga ko‘ra, so‘nggi bir yil ichida «Vagner guruhi»ning ko‘plab faxriy jangchilari Ukrainada jang qilish uchun Suriyani tark etgan.