Qrimdan chiqishda Qrim ko‘prigidagi portlashdan so‘ng katta tirbandliklar yuzaga keldi. Rossiya hukumati sayyohlarga Ukrainaning vaqtincha egallab olingan hududlari orqali yarimorolni tark etishni tavsiya qilmoqda.
Qrimdan Xerson viloyatiga olib boruvchi yo‘llarda Qrim ko‘prigida sodir bo‘lgan portlashlar va undagi transport harakati to‘sib qo‘yilgani sababli uzunligi olti kilometrgacha bo‘lgan tirbandliklar yuzaga keldi, deb xabar berdi RIA «Novosti» muxbiri 17 iyul, dushanba kuni. Qrimdan Krasnodar o‘lkasiga parom o‘tish yo‘lidan foydalanmoqchi bo‘lganlar ham bir necha soat navbat kutishga majbur, deb xabar bermoqda «Agenstvo.Novosti».
Rossiya Transport vazirligi dushanba kuni o‘z saytida paromlarda faqat yuk mashinalari va avtobuslar harakatlanishini ma’lum qildi. Krasnodar o‘lkasidan Qrimga borishni istaganlarga idora shaxsiy avtomobillarini Tamandagi avtoturargohda qoldirib, yarimorolga poyezdda borishni taklif qildi.
Qrimga avtomashinada borish yoki undan chiqib ketish istagida bo‘lgan sayyohlarga Rossiya Transport vazirligi tomonidan Ukrainaning vaqtincha egallab olingan hududlari orqali quruqlikdagi yo‘nalish taklif qilingan. Shu maqsadda Xerson, Zaporijjya va Donetsk viloyatlari «hokimiyati» Qrimdan Rostov viloyatiga Chongar, Armyansk, Novoalekseyevka va Melitopol orqali olib boruvchi tegishli yo‘nalishlarda komendantlik soati bekor qilinganini bildirdi, deb xabar berdi «Dojd» telekanali.
Qrim ko‘prigida portlashlar sodir bo‘lgani haqida Rossiya va Ukraina ommaviy axborot vositalari hamda Telegram-kanallari 17 iyul, dushanba kuni erta tongda xabar berdi. Ko‘prik transport harakati uchun yopilgan. Keyinroq Milliy aksilterror qo‘mitasi Qrim ko‘prigiga Ukraina suvusti dronlari tomonidan hujum qilingani haqida xabar berdi. «Soat 03:05da Ukrainaning ikkita uchuvchisiz suvusti apparati Qrim ko‘prigiga hujum qildi. Natijada Qrim ko‘prigining yo‘l qismi shikastlangan», - deya qo‘mita bayonotidan iqtibos keltirgan «Interfaks».
