Neymar «Barselona»ga qaytishi mumkin, Keynning «Bavariya»ga transferi hal bo‘lmayapti.
Yozgi transferlar davom etmoqda, yana bir qator futbolchilar o‘zlariga yangi klub topishdi, yana bir qancha transferlar hal bo‘lishi kutilmoqda. Quyida so‘nggi kunning eng asosiy transfer xabarlari dayjesti.
So‘nggi kunlarda amalga oshirilgan transferlar
«Manchester Siti» himoyachilar bo‘yicha transfer rekordini yangiladi
Yoshko Gvardiol 90 mln yevro (yana 10 mln yevro bonus) evaziga «RB Leypsig»dan o‘tgan mavsumda trebl sohibi bo‘lgan jamoaga o‘tdi— bu vaqtgacha himoyachi uchun buncha ko‘p pulni hech kim to‘lamagandi. 21 yoshli xorvat bilan besh yillik shartnoma tuzilgan. Hozircha «Siti»ning yangi futbolchisining eng katta yutug‘i — Pep Gvardioladan kompliment bo‘lib turibdi. Tabiiyki, familiyasi tufayli.
«Manchester Yunayted» Rasmus Hoylundni sotib oldi
Bu doston ham nihoyat yakunlandi. «Ikkinchi Holand» deb atalayotgan 20 yoshdi daniyalik hujumchi «Atalanta»dan «Old Trafford»ga keldi. Transfer qiymati — 70 mln yevrodan ortiq, bonuslar ham ko‘zda tutilgan. Tomonlar besh yillik shartnoma imzolashgan, unda kelishuvni yana bir yilga uzaytirish to‘g‘risida band bor.
Ushbu forvard o‘tgan mavsum A Seriyada 32 o‘yinda 9 ta gol va 2 ta assistga mualliflik qilgan.
«Tottenhem»da transferlar davom etmoqda
«Tottenhem» Angelos Postekoglu boshchiligida APLning yangi mavsumiga tayyorlanmoqda. «Shporlar» xo‘jayinlari tarkibni kuchaytirmoqda. «Blekbyorn»dan 18 yoshli himoyachi Eshli Fillips sotib olindi. 192 sm bo‘yga ega futbolchi Angliyaning turli yosh toifalaridagi jamoalarida o‘ynagan va yildan yilga o‘sib bormoqda. U endi katta klub bilan besh yillik shartnomaga ega bo‘ldi.
Insayder Fabritsio Romanoning xabariga ko‘ra, «Tottenhem» tez orada yana ikki futbolchi transferini e’lon qiladi. Birinchisi – «Rosario Sentral»ning 19 yoshli forvardi Alexo Velis, ikkinchisi – «Volfsburg» himoyachisi Mikki van de Ven. Argentinalik hujumchi uchun klub 15 mln yevro va bonuslar to‘laydi, niderlandiyalik futbolchi transferi 50 mln yevroga tushadi. «Tottenhem» top-4 ga qaytish uchun jiddiy kirishgan.
«Chelsi» «Brayton» darvozabonini sotib oldi
25 yoshli Robert Sanches endi Kepa Arrisabalaga bilan raqobatlashadi, jamoaning o‘tgan mavsumdagi asosiy darvozaboni Eduar Mendi Saudiya Arabistoniga yo‘l olgan. Tomonlar yetti yillik shartnoma tuzishgan.
«Chelsi» yana bir fransuzni qo‘lga kiritdi
«Monako» himoyachi Aksel Disasini «Chelsi»ga sotdi. 25 yoshli futbolchi bilan olti yillik shartnoma tuzilgan. Transfer qiymati 45 mln yevroni tashkil etgan. Disasi o‘tgan mavsumda «Monako» safida 49 o‘yin o‘tkazib, olti gol urgan va to‘rt golga uzatma bergan. «Chelsi»da Aksel darhol asosiy tarkibda o‘ynaydi, chunki klub jarohat tufayli Uesli Fofanani uzoq vaqtga yo‘qotgan.
«Latsio»da yaponiyalik futbolchi
Yaponiya milliy jamoasi havbeki Daiti Kamada faoliyatini A Seriyada davom ettiradi. «Latsio» u bilan 2+1 shaklida shartnoma imzolanganini e’lon qildi. Yaponiyalik 26 yoshli futbolchi «Ayntraxt»dan erkin agent sifatida Rim klubiga ko‘chib o‘tdi.
Avvalroq, Kamadaning rimliklar safidagi yillik maoshi 3,4 mln yevroni tashkil etishi xabar qilingandi.
«Milan»ning yana bir transferi
«Milan» «Valensiya»dan amerikalik yarimhimoyachi Yunus Musani sotib olganini e’lon qildi. 20 yoshli futbolchi yangi klubi bilan 2028 yil yoziga qadar shartnoma imzolagan. Futbolchining yillik maoshi miqdori 2 mln yevroni tashkil etadi. Musa «Milan»da o‘z vaqtida Ronaldinoga tegishli bo‘lgan 80-raqamni oldi. Transfer uchun 20 mln yevro to‘langan, yana 1 mln yevro bonus sifatida ko‘zda tutilgan. Yunus «Arsenal» akademiyasi tarbiyalanuvchisi hisoblanadi, 2019 yilda «Valensiya»ga o‘tgandi. «Ko‘rshapalaklar» safida u jami 108 o‘yinda maydonga tushgan. Endi uning faoliyatida – yangi bosqich boshlanmoqda.
Yyerri Mina «Fiorentina» futbolchisiga aylandi
«Barselona»ning sobiq himoyachisi Yyerri Mina «Everton»ni tark etib, faoliyatini Italiyada davom ettiradigan bo‘ldi. «Fiorentina» klubi kolumbiyalik 28 yoshli futbolchi bilan shartnoma imzolanganini e’lon qildi. U italiyaliklar klubi safiga erkin agent sifatida qo‘shildi. Tomonlar bir yillik shartnoma imzolagan.
Avvalroq, Minaga «Paxtakor» qiziqish bildirgani haqida xabar qilingandi.
Kutilayotgan va o‘xshamagan transferlar
Neymar «Barselona»ga qaytishi mumkin
Mundo Deportivo va Diario Sport nashrlari haftaning asosiy yangiligini e’lon qilishdi — Neymar «Barselona»ga o‘tishi mumkin. Jurnalist Mabhut Al-Marri ma’lumotiga ko‘ra (u «PSJ»ga aloqador ma’lumotlar uchun ishonchli manba sifatida qaraladi), 31 yoshli vinger Kataloniyaga qaytishni istamoqda va uning hozirgi klubi ham uni to‘xtatmoqchi emas.
Ammo, nashr ma’lumotiga ko‘ra, Xavi Neymarning qaytishiga qiziqish bildirmayapti — uning hisoblashicha, braziliyalik yulduz uning loyihasi uchun kerakli futbolchi emas. Avvalroq insayder Fabritsio Romano «Barselona» vingeri Usmon Dembele «PSJ»ga ketishidan keyin kataloniyaliklar hujum chizig‘ida yangi futbolchiga ehtiyoj sezishi mumkinligi haqida yozgandi.
Kilian Mbappe bir oyog‘i bilan «Real»dami?
Kamida jurnalist Rodrigo Fayesning tasdiqlashicha shunday. Uning ma’lumotiga ko‘ra, «Real» va «PSJ» baribir ushbu superyulduz transferi bo‘yicha kelishuvga erishgan va endi 24 yoshli hujumchi Madrid klubi bilan uzoq muddatli shartnoma tuzadi. Kelishuv qiymati ochiqlanmayapti, lekin Mbappening «Real» safidagi debyuti katta ehtimol bilan Ispaniya chempionatining 1-turi doirasida «Atletik» Bilbao klubiga qarshi kechadi. O‘yin 12 avgust kuniga belgilangan.
Fabritsio Romanoning ma’lumoti esa boshqacharoq. Uning yozishicha, «PSJ»ning pozitsiyasi o‘zgarishsiz qolmoqda. Parijliklar klubi futbolchiga bir necha takliflar bergan, jumladan keyingi yil yozida ma’lum miqdorda transfer bo‘lishi evaziga shartnomani uzaytirish bo‘yicha ham. Mbappe barcha takliflarni rad etgan.
Bu vaqtda esa «Real» futbolchilari Toni Kross va Rodrigo instagramdagi sahifasi orqali Kilian Mbappening transferiga ishora qilmoqda.
Keynning «Bavariya»ga o‘tishi xavf ostida
Yozning yana bir asosiy transfer sagasida esa ishlar chappasiga ketmoqda — 4 avgust kuni «Bavariya» «Tottenhem»ga Harri Keyn bo‘yicha yakuniy taklifini yuborgan va javob qaytarish uchun dedlayn belgilagandi — o‘sha kunning oxiriga. Navbatdagi taklif shartlari oldingilaridan ancha yaxshiroq edi: myunxenliklar hujumchi uchun 100 million yevro va bonuslar sifatida yana 20 mln yevro va’da qilishgan. Oldinroq OAV «shporlar» xo‘jayini Deniel Levi futbolchi uchun aynan shuncha mablag‘ so‘rayotgani aytilgandi.
Ammo, Bild ma’lumotiga ko‘ra, londonliklar klubi rahbari bu taklifni ham e’tiborsiz qoldirgan va ta’til uchun Mayamiga uchib ketgan — Myunxendagilar buni savdoni davom ettirish sifatida baholashgan. 30 yoshli futbolchining shartnomasi muddati 2024 yilda yakuniga yetadi, Keyn esa yangi shartnoma tuzishdan bosh tortmoqda.
«Inter» Zommerni sotib olmoqda
Fabritsio Romano «Inter» va «Bavariya» Yan Zommer transferi bo‘yicha yakuniy kelishuvga erishganini e’lon qildi — 34 yoshli darvozabon endi Italiya chempionatida o‘zini sinab ko‘radi. Shveytsariyalik futbolchi myunxenliklar safiga yanvar oyida kelib qo‘shilgandi, ammo u Noyyer safga qaytganidan keyin ikkinchi raqamli darvozabon bo‘lib qolishni istamadi va anchadan buyon o‘ziga yangi klub topishni so‘rab kelayotgandi. Yakunda «Inter» uni 6 million yevroga transfer qilishga muvaffaq bo‘ldi. Tomonlar qancha muddatga shartnoma tuzayotgani ma’lum emas.
«Yuventus»ning navbatdagi nishonlari
«Yuventus» transferlar bozorida faollashmoqda. Avvalroq Romelu Lukaku va Janluidji Donnarummaga qiziqishlar to‘g‘risida xabarlar berilgandi. Endi Fabritsio Romano va Janluka Di Marsioning tasdiqlashicha, «Yuve» «Nitssa» himoyachisi Jan-Kler Todibo va «Arsenal» yarimhimoyachisi Tomas Parti transferi ustida ish olib bormoqda. Turinliklar 23 yoshli futbolchi borasida fransuz klubiga rasmiy so‘rov yuborib bo‘lgan. Shuningdek, Parti transferi bo‘yicha ham «Arsenal» bilan aloqa o‘rnatilgan, ammo hozircha ish rasmiy muzokaralargacha yetib kelmagan.
«Chelsi» va «Siti» bir futbolchi uchun raqobatlashmoqda
Insayder Fabritsio Romanoning xabar berishicha, «Chelsi» va «Manchester Siti» APL o‘rtamiyona jamoalaridan biri «Kristal Pelas» yarimhimoyachisi Maykl Olise transferiga qiziqmoqda. 21 yoshli ushbu futbolchining shartnomasidagi badal puli miqdori 40 mln yevroni tashkil etadi. Klublar Oliseni safga qo‘shib olish uchun ushbu bandni ishga tushirishi mumkin.
E’tiborli tomoni, futbolchi «Chelsi» akademiyasida yetti yil o‘tkazgan (2009 yildan 2016 yilgacha). 2022/2023 yillar mavsumida u «Kristal Pelas» uchun barcha turnirlar doirasida 40 o‘yinda maydonga tushib, ikki gol urgan va 11 golga uzatma bergan. Uning klubi bilan shartnomasi muddati 2026 yil iyun oyi oxirigacha tuzilgan.
«Milan» «Barsa» himoyachisini qo‘lga kiritadimi?
La Gazzetta dello Sport xabariga ko‘ra, «Milan» fransiyalik himoyachi Kleman Langle transferiga qiziqmoqda. Nashr ma’lumotiga ko‘ra, bu transfer 10 mln yevroga aylanishi mumkin. Ammo «rossonerilar» narxni yanada tushirishni istamoqda. Langle o‘tgan mavsumda ijara asosida «Tottenhem»da to‘p tepgandi. 28 yoshli futbolchi londonliklarning barcha turnirlar doirasidagi 35 o‘yinida maydonga tushib, bir gol urgan va ikki golga uzatma bergan. Langlening kataloniyaliklar bilan shartnomasi muddati 2026 yil yozida yakunlanadi.
«Manchester Siti» germaniyalik yosh yulduzga ko‘z tikkan
Gap Florian Virs haqida ketmoqda. 20 yoshli yarimhimoyachi bir necha yildan buyon «Bayyer» safida Bundesligada javlon urmoqda va bo‘lajak superyulduz sifatida qaralmoqda. Football Transfers ma’lumotiga ko‘ra, «Siti» ushbu iste’dodli nemisni Saudiya Arabistoniga yo‘l olgan Riyoz Mahrezga munosib o‘rinbosar sifatida ko‘rmoqda. Pep Gvardiol Virsga yuqori baho bermoqda va futbolchining o‘zi ham klubini o‘zgartirishga qarshi emas. Ammo «Bayyer» o‘z yulduzi uchun kattagina mablag‘ ishlab olmoqchi.
«Chelsi» va «Arsenal» Muhammad Quddus uchun raqobatda yutqazdi
Nufuzli The Athletic nashri yozishicha, «Brayton» «Ayaks» bilan 23 yoshli ganalik yarimhimoyachi transferi borasida kelishuvga erishgan. Angliyaning o‘rtamiyona klubi uchun bu rekord transfer bo‘ladi. Tomonlar 40 mln yevroga kelishgan. Quddusning o‘zi ham bo‘lajak klubi bilan shartnoma shartlarini kelishib olgan. Bungacha ushbu futbolchi uchun «Chelsi» va «Arsenal» klublari asosiy da’vogar sifatida ko‘rilayotgandi.
