Rodri «Real»gamas, «Barsa»ga o‘tmoqda

Niderlandiyalik futbolchi maydonga tushishga tayyor bo‘lmagan vaqtlarda murabbiy Mark Kasado, Mark Bernal yoki Erik Garsiyani navbatma-navbat tayanch zonasi uchun sinab ko‘rdi. Lekin ularning har birida alohida kamchiliklar bor edi: Kasado bosim ostida o‘zini yaxshi his qila olmaydi, so‘nggi mavsumda esa o‘zining muhim xususiyati bo‘lgan to‘psiz o‘ynashda ham oldingidek emasligi ko‘rinib qoldi; Bernal hujumlarga yaxshi qo‘shiladi, ammo tayanch zonasini ishonish uchun hali juda tajribasiz, u faqat sof tayanch yarimhimoyachisining yonida ochilishi mumkin, o‘zi asosiy tayanch yarimhimoyachisi bo‘la olmaydi; asli markaziy himoyachi bo‘lgan Erik to‘psiz yaxshi harakatlanadi, to‘p bilan esa juda ishonchsiz.

Bu pozitsiya uchun tarkibdagi ideal variant bo‘lgan Gavi ham bor, u o‘tgan mavsum oxirida, de Yongga dam berilganida ishonchli harakat qilgandi, ammo 2023-yildagi og‘ir jarohatdan endi qaytgan futbolchiga butun mavsumni ishonib bo‘lmasdi.

Shu tariqa, Frenki de Yong JCh-2026 vaqtida jiddiy jarohat olib, uzoq muddatga safdan chiqqach, «Barselona»da sifatli tayanch yarimhimoyachisiga ehtiyoj sezildi. Rodri esa 30 yoshda ekaniga qaramay, bu pozitsiyada hamon dunyoning eng yaxshilaridan biri bo‘lib qolayotganini o‘tgan jahon chempionatida isbotladi.

Rodri «Barselona»ning hozirgi tarkibidagi birorta yarimhimoyachi ega bo‘lmagan skillar to‘plamiga ega. U ancha orqada joylashganiga qaramay, eng yaxshi pleymeyker bo‘lishi mumkin. Shu bilan birga, to‘p raqiblarda bo‘lganda pozitsiya tanlashda benazir. Uning himoyalanish vaqtida o‘yinni o‘qiy olish mahorati – maksimal darajada. Yaqinda tugagan jahon chempionati o‘yinlarida ham u raqiblardan doim bir qadam oldinda bo‘la olishini ko‘rsatdi. Raqiblar qaror qabul qilishga ulgurmasidan Rodri ularni zararsizlantirishga ulguradi.

Flik o‘z tizimida hech narsani o‘zgartirmasdan, shunchaki Rodrini tarkibga qo‘shishi mumkin – shuning o‘zi «Barsa» yarimhimoyasini sezilarli darajada mustahkamlaydi. U katta tajribaga ega bo‘lgan g‘olib futbolchi va to‘g‘ridan to‘g‘ri maydondagi murabbiy vazifasini bajara oladi. Jamoa to‘pga egalik qilayotganida Rodri jamoani to‘g‘ri boshqarishni o‘z zimmasiga oladi: jamoadoshlariga qayerda tavakkalchilik qilish mumkinligini, qayerda ehtiyotkor bo‘lish kerakligini ko‘rsatib turadi. To‘p raqibda ekanida uning o‘yinni o‘qish mahorati oldingi chiziqdagi pressingda ham, tayanch zonasida himoyalanishda ham qo‘l keladi. «Barsa» tarkibida bu ishni Rodri kabi qila oladigan futbolchi yo‘q.

«Barsa» Rodrini olgani uchun «Real» uni ololmadi

Bu yozda madridliklar o‘ta faol bo‘lishdi – bu allaqachon jamoaning so‘nggi uch yillikdagi eng jiddiy transfer kampaniyasiga aylandi. Rodri jamoadagi o‘zgarishlarning muhim qismi bo‘lishi va boshqa transferlar effektini yanada oshirishi mumkin edi.

Qolaversa, u «Real» yarimhimoyasida Toni Kroos ketganidan keyin yuzaga kelgan asosiy muammoni hal qilgan bo‘lardi – maydon markazida jamoa o‘yinini ichkaridan turib boshqaradigan futbolchi yo‘q. Kroossiz o‘tgan ikki yil mobaynida ayrim futbolchilar bu vazifaning bir qismini o‘z zimmasiga olishga harakat qildi. Dani Sebalios va Ardu Guler navbati bilan ortga qaytib, hujumlarni boshlab berishdi. Shuningdek, Arbeloa Tiyago Pitarch bilan shunday tajribani amalga oshirib ko‘rdi. Ammo bu urinishlarni to‘la muvaffaqiyatli chiqdi, deb bo‘lmaydi.

Rodrining o‘yin uslubi Kroosnikiga unchalik o‘xshamaydi, ammo orqa chiziqdagi pleymeyker roliida u madridliklarga kerakli sifatni bera olgan bo‘lardi. «Real» tizimi Rodri yorqin o‘yinlar namoyish etgan «Siti» yoki Ispaniya milliy jamoasi modeliga o‘xshamaydi, «Qirollik klubi»da ushbu havbek o‘z salohiyatini to‘liq namoyon eta olishi bo‘yicha bildirilgan shubhalar ham o‘rinli. Ammo shunisiga shubha yo‘qki, «Real» Rodri bilan jamoa sifatida kuchliroq bo‘lgan bo‘lardi.

«Barsa» uni tarkibiga qo‘shib olish orqali, ikki emas, birto‘la uchta quyonni urmoqda: jamoa ashaddiy raqibiga maydon markazidagi muhim muammoni hal qilishga yo‘l qo‘ymadi; futbolchiga u o‘zini yaxshiroq his qilishi mumkin bo‘lgan tizimni taklif etdi; o‘zi esa muammoli pozitsiyasiga shu pozitsiyadagi eng kuchli futbolchilardan birini qo‘lga kiritdi.

«Siti» endi unga o‘rinbosar izlamoqda

«Shaharliklar» uchun Rodrining ketishi – ko‘ngilsiz holat. Ushbu yarimhimoyachi xochsimon bog‘lamidagi jarohat tufayli 2024/25 yillar mavsumining katta qismini o‘tkazib yuborganida ham «Siti» qiynalib qolgandi. U yo‘qligida Pep Gvardiola jamoasi juda ko‘p o‘yinlarda yutqazgan, jumladan Chempionlar ligasi pley-off bosqichida «Real»ga qarshi ikki o‘yinni ham boy bergandi.

Ispaniyalik mutaxassis o‘sha og‘ir davrda Rodrining jamoadagi o‘rnini argentinalik Lionel Messining «Barselona»dagi o‘rni bilan taqqoslagandi.

«Bizga Rodri yetishmayapti – jahonning eng yaxshi futbolchisi. Messi eng yaxshi futbolchisi bo‘lgan «Barselona»dagi davrimizni tasavvur qiling, ammo biz o‘sha mavsumda Leosiz o‘ynar olardik», – deya iqror bo‘lgandi Gvardiola.

Endi «Siti»da yangi sahifa – 55 yoshli mutaxassis 10 yillik faoliyatidan keyin klubni tark etdi. Murabbiylik kreslosini uning shogirdi va sobiq yordamchisi Enso Mareska egalladi – va unga ham Rodri ketgani ma’qul emas. Angliya Superkubogi uchun «Arsenal»ga qarshi kechgan va yirik hisobdagi mag‘lubiyat bilan yakunlangan o‘yindan keyin (0:3) italiyalik mutaxassis ochiqchasiga shunday dedi:

«U yaqinda jahon chempionatida g‘olib chiqqandi, «Oltin to‘p» sohibi. U har qanday jamoaga kerak bo‘lgan yuqori darajali futbolchi».

Mareska jamoada ichki zaxiralar mavjudligini aytganiga qaramay, «Siti» Rodriga o‘rinbosar qidirmoqda. Hozircha asosiy nomzod – «Lill»dagi 18 yoshli Ayyub Buaddi. Marokashlik yarimhimoyachi Fransiya milliy chempionati (u 2025/26 yillar mavsumida barcha turnirlar doirasida 42 o‘yin o‘tkazdi) va milliy jamoada (JChda 5 ta o‘yinda maydonga tushdi) o‘zini ko‘rsatib, allaqachon top-klublar nazariga tushgan. Ammo uni qo‘lga kiritishga aynan «shaharliklar» yaqinroq, OAV ma’lumotlariga ko‘ra, inglizlar klubi allaqachon Buaddi bilan shaxsiy shartnoma bo‘yicha kelishib qo‘ygan.

Shu bilan birga, bu transferni rasmiylashtirishga hali uzoq. «Lill» o‘z yetakchilaridan biri bilan shu mavsumning o‘zida xayrlashmoqchi emas, mahalliy insayderlarga ko‘ra, klub uni yana bir mavsum ijara asosida o‘zida qoldirish variantlarini qidirmoqda. Qolaversa, Ayyubning transfer narxi ham kam emas – Transfermarkt portali uning transfer narxini 80 million yevroga baholagan, fransuzlar klubi esa 100 million yevro talab qilmoqda. Shu tufayli «Siti» uchun Rodriga voris topish masalasi dolzarb bo‘lib turibdi.