«Barselona» Ispaniya milliy jamoasining 30 yoshli yarimhimoyachisi Rodri «Manchester Siti»dan transfer qilinganini rasman e’lon qildi. Amaldagi jahon chempioni ko‘k-anorranglilar klubi bilan 2030-yilga qadar amal qiluvchi shartnoma imzolagan. OAV ma’lumotiga ko‘ra, ushbu transfer 60 million yevro va qo‘shimcha bonuslar (16,5 milliongacha yetadi) evaziga hal bo‘lgan, futbolchi yangi klubida o‘zining sevimli 16-raqami ostida to‘p suradi.
«Bu uning ritmi»
Kataloniyaliklar yarimhimoyachining tanishtiruv marosimini 18-avgust kuni o‘tkazdi.
«Barselona» va «Manchester Siti» futbol olamida Rodri nomi bilan tanilgan Rodrigo Ernandes Kaskante transferi bo‘yicha yakuniy kelishuvga erishgan. Futbolchi bilan shartnoma 2030-yil 30-iyuniga qadar mo‘ljallangan. Ispaniyalik ushbu futbolchi tayanch yarimhimoyachisi pozitsiyasida o‘ynaydi va o‘z pozitsiyasida dunyoning eng yaxshilaridan biri hisoblanadi. U o‘z taktik uquvi, to‘p bilan sovuqqon harakatlanishi, uni raqibdan olib qo‘yish qobiliyati va uzatmalari aniqligi bilan ajralib turadi», – deyiladi klub rasmiy sayti xabarida.
Ko‘k-anorranglilar klubi ijtimoiy tarmoqlardagi sahifalarida ham «Oltin to‘p» sohibi sha’niga balandparvoz so‘zlarni ayashmagan.
«Bu uning ritmi va o‘yini. Makon va vaqt ustasi Barselonada to‘xtadi», – deyilgan Rodri transferi anons qilingan postda.
Futbolchining o‘zi kataloniyaliklar klubiga o‘tishini orzuning ushalishi deb atagan.
«„Barselona“ uchun o‘ynash – men uchun orzu edi. Men jamoadoshlarim bilan tezroq uchrashishni juda xohlayapman, ularning ko‘pchiligini yaxshi taniyman (Pedri, Gavi, Dani Olmo, Pau Kubarsi, Erik Garsiya, Joan Garsiya va Lamin Yamal kabi futbolchilar unga Ispaniya milliy jamoasida ham jamoadosh). Chempionlar ligasida va oldinda bizni kutayotgan boshqa turnirlarda g‘alaba qozonish uchun bor kuchimizni ishga solib, ishlash vaqti keldi», – deya uning so‘zlaridan iqtibos keltiradi jurnalist Viktor Navarro.
Transferning moliyaviy jihatlari rasman oshkor etilmayapti. The Athletic xabariga ko‘ra, «Barselona» futbolchi uchun 60 million yevro to‘lashi kafolatlangan. Ko‘k-anorranglilar yana 16,5 million yevrogacha bo‘lgan mablag‘ni bonuslar ko‘rinishida o‘tkazib berishi mumkin. Shundan 11 million yevro qismi oson erishiladigan bonuslar. OAV ma’lumotiga ko‘ra, futbolchi uchun uning sevimli bo‘lgan 16-raqami berilgan, «Barselona»da bu raqam oldin Fermin Lopesga tegishli edi – 23 yoshli yarimhimoyachi taniqli futbolchi uchun bu raqamni bo‘shatib bergan.
«Barselona» «Real» bilan raqobatda yutib chiqdi
Ispaniyalik yarimhimoyachi «Manchester Siti»da yetti mavsum o‘ynadi, bu davr mobaynida u inglizlar klubi safida 298 o‘yinda maydonga tushib, 28 gol urdi va 14 ta sovrinni qo‘lga kiritdi. Uning klublar futbolidagi eng asosiy voqea 2023-24 yillar mavsumi Chempionlar ligasi finalida «Inter»ga qarshi kechgan o‘yinda g‘alaba golini urishi bo‘lgandi. O‘sha mavsumda «shaharliklar» trebl qayd etgan, 2024-yil kuzida esa futbolchiga «Oltin to‘p» topshirilgandi. U keyin jarohat tufayli keyingi mavsumni o‘tkazib yubordi, ammo 2026-yil yozida Ispaniya milliy jamoasini sardor sifatida jahon chempionatiga olib bordi va sovrinlar qatoriga jahon chempionligi kubogini ham qo‘shib qo‘ydi.
Avvalroq «Siti» rahbarlari shartnomasi muddati 2027-yil yozida tugashi kerak bo‘lgan Rodriga yangi shartnoma taklif qilgani haqida xabarlar tarqalgandi, ammo futbolchi vataniga qaytishni xohlagan, u karyerasining boshida Ispaniyaning «Vilyarreal» va «Atletiko» kabi klublarida ham o‘ynagandi.
Yozgi transferlar boshida ushbu futbolchi uchun «Real» asosiy da’vogar hisoblanayotgandi. «Barselona» kurashga keyinroq qo‘shildi, ammo futbolchini o‘z tomoniga og‘dirishga muvaffaq bo‘ldi.
Tanishtiruv marosimida Rodri ham bunga to‘xtalgan:
«Bu to‘g‘ri, men uchun yana bir taklif kelib tushgandi, ammo «Barselona» mening birinchi tanlovim edi. Rahbariyatga ham shuni aytdim.
Bu alohida kun, mening faoliyatimdagi muhim yangi sahifa. Bu qaror oson bo‘lmadi – birinchi navbatda, menga hamma narsani bergan va men o‘zimni juda baxtiyor his qilgan «Siti»ni tark etayotganim uchun. Men bu klubndan doimo minnatdor bo‘lib qolaman».
Jahon chempionatidan keyin yarimhimoyachi belida kichik jarrohlik amaliyotini o‘tkazgandi. Muxlislar uning jismoniy holatidan xavotirda edi, ammo futbolchi ularni xotirjam qiluvchi so‘zlarni aytdi.
«Men mutlaqo sog‘lomman va o‘ynashga tayyorman! Bu jiddiy operatsiya emasdi. Umid qilamanki, ertagayoq mashg‘ulot o‘tkaza olaman», – degan futbolchi.
