Haftaning asosiy 10 transferi: «PSJ» yanada kuchaymoqda, «Chelsi» qozoq hujumchisini ijaraga berib yubordi

Avgust oyining ikkinchi yarmida ham Yevropa klublarida qator shov-shuvli transferlar amalga oshirildi.

Mika Godts

Yoshi: 21
Ampluasi: chap qanot vingeri
Qayerdan: «Ayaks»
Qayerga: «PSJ»
Transfer qiymati (Transfermarkt): 45 million yevro

Oy boshida «Monako» o‘ng qanot vingeri Magnes Akliushni transfer qilgan «PSJ» biroz o‘tib kelgusida top futbolchi darajasiga chiqishi mumkin bo‘lgan yana bir iste’dodli vingerni o‘z safiga qo‘shib oldi. Mika Godts «Ayaks» safida jami 115 o‘yinda maydonga tushib, 26 gol urgan va 28 golli uzatma muallifi bo‘lgan.

U ayniqsa 2025/26 yillar mavsumida porladi: Niderlandiya chempionatining 32 o‘yinida 17 gol urib, 12 assist amalga oshirdi. Belgiyalik futbolchi ligada «gol plyus pas» tizimida eng sermahsul futbolchiga aylandi. «PSJ» transfer uchun 45 million yevro to‘ladi, bonuslar hisobiga bu summa 55 million yevrogacha yetishi mumkin.

Godts bu yozda Parijni tark etishi kutilayotgan Bredli Barkolyaning (unga «Liverpul» tomonidan jiddiy qiziqish mavjud) o‘rniga olib kelindi. U katta ehtimol bilan dastlabki mavsumlarda Xvicha Kvaratsxeliyadan keyingi ikkinchi variant bo‘ladi va asosan ichki chempionat o‘yinlarida maydonga tushiriladi.

Jed Spens

Yoshi: 26
Ampluasi: o‘ng qanot himoyachisi
Qayerdan: «Tottenhem»
Qayerga: «Inter»
Transfer qiymati: 30 million yevro

Denzel Dumfris «Real»ga yo‘l olganidan keyin «Inter» o‘ng qanot himoyachisiga ehtiyoj sezayotgandi – «Tottenhem»da esa ideal variant topildi. Spens jamoadoshlari fonida sifatli o‘yini bilan ajralib turardi va 2026-yilgi jahon chempionatida ham o‘zini yaxshi tomondan ko‘rsatdi. U niderlandiyalik futbolchining yo‘qligini sezdirmaslik uchun barcha kerakli skillarga ega: pressingda yaxshi ishlaydi va hujumlarga ham tez-tez qo‘shiladi. «Inter» angliyalik himoyachi uchun 30 million yevro to‘ladi, yana besh million yevro bonuslar ko‘rinishida berilishi mumkin.

Ferran Torres

Yoshi: 26
Ampluasi: hujumchi
Qayerdan: «Barselona»
Qayerga: «PSJ»
Transfer qiymati: 48,5 million yevro

Torres 2022-yildan buyon «Barselona» safida o‘ynab kelayotgandi – bu vaqt mobaynida u 207 o‘yinda maydonga tushib, 65 gol urdi. Okeanortida bo‘lib o‘tgan jahon chempionati finalida Ispaniyaga g‘alaba keltirgan golni urgan ushbu hujumchini Parijdagilar bu yozda «Milan»ga transfer qilingan Gonsalu Ramushning o‘rniga olib kelishdi. Ya’ni u endi jamoaning asosiy markaziy hujumchisi bo‘ladi va «Barselona»dagidan farqli o‘laroq yetarlicha o‘yin amaliyotiga ega bo‘ladi.

Kristian Romero

Yoshi: 28
Ampluasi: markaziy himoyachi
Qayerdan: «Tottenhem»
Qayerga: «Atletiko»
Transfer qiymati: 40 million yevro

Argentinalik himoyachi o‘tgan mavsum oxirida jarohatdan tiklanish jarayonini o‘tash o‘rniga vataniga ketib qolgani tufayli «Tottenhem» bilan kelishmovchilik yuzaga kelgandi. Endi u o‘zi uchun deyarli ideal jamoa safiga kelib qo‘shildi – ko‘plab argentinalik futbolchilar o‘ynaydigan va uzoq yillardan buyon argentinalik mutaxassis boshqaruvida bo‘lgan jamoaga. Kristian keskin, tajovuzkor va fol chegarasida o‘ynashga odatlangan – bunday futbolchilar esa Diyego Simeonega yoqadi. Romero «Tottenhem» safiga 2021-yilda qo‘shilgandi va Angliyada o‘tgan besh mavsum davomida barcha turnirlar doirasida oltita qizil kartochka oldi. Bu davr oralig‘ida APLning boshqa birorta klubi futbolchisi bu qadar ko‘p marta maydondan chetlatilmagan. Romero «Atletiko» bilan besh yillik shartnoma tuzdi.

Doston Satpayev

Yoshi: 18
Ampluasi: hujumchi
Qayerdan: «Chelsi»
Qayerga: «Byornli»
Transfer qiymati: ijara

«Chelsi» Satpayevni «Qayrat»dan sotib olish bo‘yicha 2025-yil fevralida kelishuvga erishgandi, ammo forvard 18 yoshga to‘lganidan keyingina kelishuv kuchga kirdi. Shu yozda qozog‘istonlik futbolchi londonliklar bilan 2033-yilga qadar amal qiluvchi shartnoma tuzdi.

Doston «Chelsi» bilan Avstraliya va Osiyo bo‘ylab o‘tkazilgan turnelarda ishtirok etishga ulgurdi: u to‘rt o‘yinda maydonga tushib, «Vestern Sidney Uonderers»ga qarshi o‘yinda gol ham urdi. Endi u oldindagi mavsumni «Byornli»da ijara asosida o‘tkazadi. Chempionshipda Doston haqiqiy ingliz futboli havosini his qilishi mumkin.

Romelu Lukaku

Yoshi: 33
Ampluasi: hujumchi
Qayerdan: «Napoli»
Qayerga: «Fenerbahche»
Transfer qiymati: 6 million yevro

Belgiyalik forvard o‘tgan mavsumda «Napoli» safida barcha turnirlar doirasida atigi yetti o‘yinda maydonga tushib, birgina gol urdi. Jarohat tufayli u mavsumning katta qismini o‘tkazib yuborgandi, ammo jahon chempionati arafasida tiklanishga ulgurdi va hamon yaxshi sport formasida ekanini namoyish etdi.

Endi Lukaku olti million yevro evaziga «Fenerbahche»ga borib qo‘shildi. Futbolchining yoshi, og‘ir mavsumdan keyingi holati va katta miqdordagi maoshi hisobga olinsa, bu turklar klubi uchun katta tavakkalchilik. Boshqa tomondan, Lukaku hozir ham Superliga miqyosida to‘purar bo‘la oladi.

Dushan Vlahovich

Yoshi: 26
Ampluasi: hujumchi
Qayerdan: «Yuventus»
Qayerga: «Beshiktosh»
Transfer qiymati: erkin agent

Serbiyalik hujumchi transferlar oynasining katta qismini top darajadagi klublardan taklif kutib o‘tkazdi, ammo 26 yoshli forvardning moliyaviy talablarini qondira oladigan klub topilmadi. Yakunda Vlahovich ham faoliyatini Turkiyada davom ettiradigan bo‘ldi.

«Beshiktosh» Dushanni erkin agent sifatida qo‘lga kiritdi, «Yuventus» uni 4,5 yil oldin «Fiorentina»dan 70 million yevro evaziga transfer qilgandi, shuningdek, agentlik komissiyasi va bonuslar ko‘rinishida yana 10 million yevro sarflandi, futbolchining o‘ziga bu davr mobaynida yana 77 million yevro to‘landi. Yakunda esa 162 million yevro sarflangan futbolchi klubni tekinga tark etdi. Norasmiy ma’lumotlarga ko‘ra, futbolchi Istanbulda ham yiliga 7,5-8 million yevro atrofida maosh oladi.

Vlahovich 2025/26 yillar mavsumida barcha turnirlar doirasida 23 o‘yinda 10 gol urdi va ikki golga uzatma berdi. Shunday ekan, uni hisobdan chiqarishga hali erta.

Nauel Molina

Yoshi: 28
Ampluasi: o‘ng qanot himoyachisi
Qayerdan: «Atletiko»
Qayerga: «Roma»
Transfer qiymati: 13 million yevro

Molina La liganing o‘tgan mavsumida 26 o‘yinda maydonga tushdi. Ushbu argentinalik himoyachi «Atletiko»da o‘tgan to‘rt mavsumda jami 181 o‘yin o‘tkazib, to‘qqiz gol urgan va 17 golli uzatma muallifi bo‘lgan. Molina Italiyada oldin ham o‘ynagan, uning Yevropadagi faoliyati «Udineze»da boshlangandi. U Argentina milliy jamoasida 65 o‘yinda maydonga tushib, 2022-yilgi jahon chempionati g‘olibi bo‘lgan, 2021 va 2024-yillarda esa Amerika kubogi sohibi bo‘lgan.

«Roma» endi 13 million yevro to‘lab, ushbu futbolchini o‘ziniki qildi, «Atletiko» bonuslar ko‘rinishida yana bir necha million yevroga ega bo‘lishi mumkin.

Usmon Diomande

Yoshi: 22
Ampluasi: markaziy himoyachi
Qayerdan: «Sporting»
Qayerga: «Nottinghem Forest»
Transfer qiymati: 40 million yevro

«Nottinghem Forest» so‘nggi uch yarim mavsumda «Sporting»da 132 o‘yin o‘tkazib, jamoaga ikki marta Portugaliya chempionatida g‘olib bo‘lishda yordam bergan istiqbolli himoyachini qo‘lga kiritdi. Inglizlar klubi ivuarlik futbolchi transferi uchun 40 million yevroning bahridan o‘tishdi.

Diomande yangi jamoasi safida hali maydonga tushmadi, ammo allaqachon muxlislarning nazariga tushdi. Ushbu yangi futbolchi uchun stadion bo‘ylab ekskursiya o‘tkazildi va uni klub muzeyiga olib kirishdi. Diomande ikkita Yevropa chempionlari kubogini ko‘rganida ko‘zlariga ishona olmay qotib qolgani aks etgan videolar tarqaldi. U sovrinlar ostidagi sanani ham tekshirib ko‘rdi, «Nottinghem» ularni 1979 va 1980-yillarda qo‘lga kiritgandi.

Xeronimo Rulli

Yoshi: 34
Ampluasi: darvozabon
Qayerdan: «Marsel»
Qayerga: «Manchester Siti»
Transfer qiymati: 3,5 million yevro

«Manchester Siti» o‘yin amaliyoti yo‘qligi tufayli bu yozda «Lids»ga o‘tib ketgan Jeyms Trafford o‘rniga yangi ikkinchi darvozabon oldi. Xeronimo Rulli oldin ham «shaharliklar» a’zosi bo‘lgan, klub uni 2016-yilda «Real Sosedad»dan sotib olib, ispanlar klubida ijarada qoldirgandi. Oyoqda yaxshi o‘ynay olishi tufayli Pep Gvardiolaning nazariga tushgan ushbu darvozabon baribir inglizlar jamoasida o‘ynamadi va bir yil o‘tib «Real Sosedad»ning o‘ziga qaytarib sotib yuborildi. Ammo endi Gvardiola o‘rniga kelgan va oyoqda yaxshi o‘ynaydigan darvozabonlarni undanda ko‘proq qadrlaydigan Enso Mareska 34 yoshli darvozabonni klubga qaytardi. Klub argentinalik posbon transferi uchun «Marsel»ga bonuslar bilan qo‘shib hisoblaganda 3,5 mln yevro to‘laydi va u bilan «2+1» ko‘rinishida shartnoma imzolandi.