Misrning Port-Said shahrida O‘zbekiston savdo uyi ochilishi kutilyapti

Muzokaralar davomida Port-Said shahrida O‘zbekiston Savdo-sanoat palatasining savdo uyini ochish taklifi bildirildi. Bu O‘zbekiston-Misr tovarlari va xizmatlarini import hamda eksport qilish uchun markaz bo‘lib xizmat qilishi qayd etildi.

O‘zbekiston Savdo-sanoat palatasining mazkur tashabbusi hayotga tatbiq etilishi natijasida, kelgusida mamlakatdan Afrika, Yevropa va Osiyo mamlakatlariga tovarlarni eksport qilish imkoniyati yaratiladi.

Port Said gubernatorining o‘rinbosari Said Amro Usmon o‘z nutqida ushbu loyihani amalga oshirishdan manfaatdor ekanini ta’kidladi. Uning aytishicha, O‘zbekiston mahsulotlarini Port-Said orqali Misr, Afrika va Yevropaga olib kirish eng maqbul variant. 

«Chunki Port Saidda logistika uchun barcha zarur sharoitlar, jumladan, omborxona, transport kommunikatsiyalari va xorijiy investitsiyalar uchun imtiyozlar mavjud. Shu sababli biz O‘zbekiston Savdo-sanoat palatasining savdo uyini tashkil etish tashabbuslarini amalga oshirish uchun har tomonlama yordam berishga tayyormiz», dedi u.

Uchrashuv yakunida tomonlar Savdo uyini tashkil etish bo‘yicha barcha masalalarni atroflicha o‘rganish va loyihani hayotga tatbiq etish maqsadida qo‘shma ishchi guruh tuzishga kelishib oldi.