«Xanchjou-2022» Osiyo o‘yinlari sovrindorlarini rag‘batlantirish miqdori eslatildi 

23 sentabr – 8 oktabr kunlari Xitoyning Xanchjou shahrida Osiyo o‘yinlari o‘tkaziladi.

«2023 yilda Xanchjou shahrida (Xitoy) bo‘lib o‘tadigan XIX Osiyo o‘yinlari va IV Paraosiyo o‘yinlariga O‘zbekiston sportchilarini kompleks tayyorlash to‘g‘risida»gi prezident qarorida terma jamoalar, alohida sportchilarning musobaqaga tayyorgarlik ko‘rishi uchun barcha shart-sharoitlar yaratib berilishi nazarda tutilgan.

Shuningdek, ularni rag‘batlantirish miqdori ham belgilangan. Jumladan, Osiyo va Paraosiyo o‘yinlarida oltin medalni qo‘lga kiritgan sportchilar 5 ming AQSh dollari miqdorida mukofotlansa, kumush va bronza medali sohiblari 3 ming va 2 ming dollar bilan, ularni tayyorlagan trenerlar 2,5 ming, 1,5 ming hamda 1 ming dollar bilan taqdirlanadi. 

Bundan tashqari, Osiyo va Paraosiyo o‘yinlarida g‘olib va sovrindor bo‘lgan O‘zbekiston sportchilarini tayyorlagan boshqa mutaxassislar 2 ming, 1 ming, 500 dollar miqdorida har bir medal uchun bir martalik pul mukofotlari bilan rag‘batlantirilishi nazarda tutilgan. 

Shuningdek, qarorga asosan g‘olib va sovrindor sportchilar, ularni tayyorlagan trenerlar qo‘shimcha ravishda mahalliy budjet mablag‘lari hisobidan quyidagi miqdorda bir martalik pul mukofotlari bilan rag‘batlantiriladi: 

a) Osiyo va Paraosiyo o‘yinlarida g‘olib va sovrindor bo‘lgan O‘zbekiston sportchilari: 

- oltin medal uchun — Bazaviy hisoblash miqdorining (BHM) 300 baravari miqdorida (hozir 99 mln so‘m); 

- kumush medal uchun — BHM 200 baravari miqdorida (hozir 66 mln so‘m); 

- bronza medal uchun — BHM 100 baravari miqdorida (hozir 33 mln so‘m); 

b) Osiyo va Paraosiyo o‘yinlarida g‘olib va sovrindor bo‘lgan O‘zbekiston sportchilarini tayyorlagan trenerlar: 

- oltin medal uchun — BHM 200 baravari miqdorida (hozir 66 mln so‘m);

- kumush medal uchun — BHM 100 baravari miqdorida (hozir 33 mln so‘m);

- bronza medal uchun — BHM 50 baravari miqdorida (hozir 16,5 mln so‘m);

«Xanchjou-2022» Osiyo o‘yinlarida 400 nafardan ziyod sportchi 39 ta sport turida O‘zbekiston sharafini himoya qilishi kutilmoqda.