Osiyo oʻyinlari kundaligi. Oʻzbekiston bitta oltin bilan kifoyalandi va Hindistonni oldinga oʻtkazib yubordi

Parijdagi olimpiada sovrindorlaridan yana biri, -57 kg vazn toifasidagi Gʻulomjon Abdullayev ham ishonchni oqlamadi. U ilk bosqichdayoq yaponiyalik Yamato Ogavaga magʻlub boʻldi (2:4), raqib finalga chiqmagani tufayli unda medal uchun ikkinchi imkoniyat ham boʻlmadi.

Ayollar kurashida -53 kg vazn toifasida qatnashgan Sohibjamol Esbosinova ham birinchi bosqichdayoq hindistonlik Antimga yutqazdi (0:8). Raqib finalga yetib borgach, unda bronza uchun kurashish imkoniyati tugʻildi, ammo u oʻtish bahsida qozogʻistonlik Shugila Umirbekdan magʻlub boʻldi (2:2, raqib oxirgi ballni qoʻlga kiritgani uchun gʻalabani qoʻlga kiritdi).

-57 kg vazn toifasida qatnashgan Layloxon Sobirova birinchi bosqichda indoneziyalik Mutoharohdan ustun kelgandi (10:0), ammo keyingi bosqichda qozogʻistonlik Nilufar Rayimovaga imkoniyatni boy berdi (5:18). Unda medal uchun ikkinchi imkon ham boʻlmadi.

Taekvondo

Oʻzbekiston taekvondo jamoasi bugungi dasturda 4 nafar sportchi bilan qatnashdi va shundan ikki kishi medal qoʻlga kiritdi.

Ayollar oʻrtasida -57 kg vazn toifasida ishtirok etgan Madina Mirabzalova ilk bosqichdayoq tailandlik Natkamon Vassanaga yutqazdi (1:2).

Erkaklar oʻrtasida -68 kg vazn toifasida Najmiddin Qosimhojiyev ilk raqibi, indoneziyalik Jafif Putravitamani magʻlub etgandi (2:0), ammo keyingi bosqichda tailandlik Banlung Tubtimdangga yutqazdi (1:2).

Ayollar oʻrtasida +67 kg vazn toifasida qatnashgan Svetlana Saidova (Osipova, turmushga chiqqanidan keyin familiyasini oʻzgartirgan) dastlabki bosqichda hongkonglik Ho Yan Cheungni magʻlub etdi (2:0), chorakfinalda vetnamlik Ti Hiyem Bak toʻsigʻidan ham oʻtdi (2:0), ammo yarimfinalda xitoylik Mu Vengjega yutqazib qoʻydi (0:2) va bronza medal bilan kifoyalandi.

Ushbu sportchi Parij olimpiadasida finalgacha borgan, jahon chempioni boʻlgan, ammo Osiyoni zabt eta olmayapti – bundan oldin Jakarta va Hangchjoudagi turnirlarda ham u yarimfinaldan oʻta olmagandi.

Erkaklar oʻrtasida +80 kg vazn toifasi vakili Marat Mavlonov nisbatan yaxshiroq turnir oʻtkazdi. U chorakfinalda tayvanlik Yu-jin Huang (2:1), yarimfinalda janubiy koreyalik Kang Sanghyunni (2:0) magʻlub etgandi, ammo finalda eronlik Ariyan Salimiga yutqazib qoʻydi (0:2), bahs davomida oʻzbekistonlik sportchi qoʻlidan jarohat ham oldi.

Dzyudo

Oʻzbekistonlik dzyudochilar bugun aralash jamoaviy dasturda ishtirok etishdi va bronza medalga ega chiqishdi. Jamoa ilk bosqichdayoq turnir favoriti Yaponiyaga duch keldi va 1:4 hisobida yutqazdi. Shundan keyin bronza uchun bahslar boshlandi. Bu yoʻlda avvaliga Tayvan 4:0 hisobida, keyin esa Janubiy Koreya 4:2 hisobida magʻlub etildi va bronza medal qoʻlga kiritildi.

Futbol

Oʻzbekiston U-23 jamoasi 3-oktabr kuni Osiyo oʻyinlarining bronza medali uchun Xitoyga qarshi oʻyin oʻtkazdi. Nagoyadagi Toyota stadionida oʻtgan uchrashuvning asosiy vaqtida durang (2:2) qayd etildi.

Qoʻshimcha boʻlimlar oʻtkazilmasdan darhol penaltilar seriyasi boshlandi. Yarimfinalda Yaponiyaga qarshi oʻyinda boʻlgani kabi, bu safar ham Ravshan Haydarov shogirdlarining omad lotereyasida omadi kelmadi (3:4).

Turnir jadvalidagi holat

Ertaga, 4-oktabr kuni turnirning yopilish marosimi boʻlib oʻtadi va oʻzbekistonlik sportchilar boshqa medal qoʻlga kiritishi kutilmayapti.

Asosiy bahslar yakunlanganidan keyin Oʻzbekiston hisobida 21 ta oltin, 25 ta kumush va 24 ta bronza medal bor. Delegatsiya soʻnggi bir hafta davomida umumiy reytingda toʻrtinchi oʻrinda turgandi, ammo bugungi natijalardan keyin Hindiston medallar soni boʻyicha Oʻzbekistonga tenglashdi, kumush medallar soni koʻproqligi evaziga toʻrtinchi oʻrinni tortib oldi.

Oʻzbekistonning Osiyo oʻyinlaridagi eng yaxshi natijasi bungacha 2023-yilgi Hangchjou oʻyinlarida qayd etilgandi. Delegatsiya oʻshanda 22 ta oltin, 18 ta kumush va 31 ta bronza bilan Hindistondan keyingi beshinchi oʻrinni egallagandi. Bu safar hindistonlik sportchilarning natijasi pasaygandi (oldingi 28 ta oltinga qarshi 21), ammo shu ham Oʻzbekistondan oldinda joylashish uchun yetarli boʻldi.