Eron qishloq xo‘jaligi vazirining o‘rinbosari, Qishloq xo‘jaligi tadqiqotlari, ta’lim va kengaytirish tashkiloti AREEO direktori Mojtaba Xayom Nikui boshchiligidagi delegatsiya O‘zbekistonga keldi, deb xabar bermoqda «Dunyo».
Tashrif doirasida Eron vakillari O‘zbekiston qishloq xo‘jaligi vazirining o‘rinbosari Alisher Shukurov, oliy ta’lim, fan va innovatsiyalar vazirining o‘rinbosari Sarvar Buzrukxonov bilan ikki tomonlama uchrashuvlar o‘tkazdi. Shuningdek, Qishloq xo‘jaligida bilim va innovatsiyalar milliy markazi faoliyati bilan tanishdi.
Bo‘lib o‘tgan uchrashuvlar chog‘ida qishloq xo‘jaligi sohasida qo‘shma innovatsion tadqiqotlarni amalga oshirish, qishloq xo‘jaligi tarmoqlarining malakali mutaxassislarga bo‘lgan joriy va istiqboldagi ehtiyojlarini hisobga olgan holda kadrlarni qayta tayyorlash va ularning malakasini oshirish ishlarini samarali tashkil etish masalalari muhokama qilindi.
Qishloq xo‘jaligida innovatsiyalardan foydalanish ishlab chiqarish samaradorligini oshirishning asosiy yo‘nalishlaridan biri ekanligi qayd etildi. Oziq-ovqat xavfsizligi, jumladan, pistachilikni rivojlantirish va pista navlarini yaratish borasida tadqiqot ishlarini amalga oshirish bo‘yicha hamkorlik qilish istiqbollari ko‘rib chiqildi. Eron tomoni ushbu yo‘nalishda tajriba almashishga tayyorligini bildirdi.
Uchrashuvlar yakunida yosh olimlarning xorijiy ilmiy markazlar va universitetlarda qisqa muddatli ilmiy amaliyotini tashkil etish va moliyalashtirish to‘g‘risidagi shartnoma imzolandi.
Ushbu shartnoma asosida joriy yil oktyabr oyidan boshlab 7 nafar o‘zbekistonlik mutaxassislar biotexnologiya, veterinariya, bog‘bonchilik, urug‘chilik, o‘rmonchilik, mexanizatsiya va vaksinatsiya yo‘nalishlari bo‘yicha AREEO’da amaliyot o‘tish maqsadida Eronga boradi.
